Matupi ralkap 2 an tlan ih SAC ralhraang in Khawmi 4 an kai

Chin ramkulh, Matupi ih Myanmar Economic Bank humvennak ṭuanvo latu ralkap 2 an tlan ih, an mah thawn pehparin SAC ralhraang in Khawmi 4 an kai.

Bank kiltu ralkap 2 cu meithal ralthuam famkim thawn April 21 zaan ah an tlansuak ti a si ih, thuhla a suak veten Khuasung boruak a sosang tiah khawmi pawl in an sim.

“Ralkaptlan 2 Lamhmuhtu ti`n CDM tuahtu Tlawng saya nupa le Khawmi 2 cu an inn rori ah an kai. Khawsung boruak a danglam thluh. Khawsung ih ṭuanvo latu ralkap rori an tlan tikah netalam cun humvennak ṭuanvo latu ralkap pawl meithal tivek teh an pe ngam nawn pei maw? sim theih a si lo” tiah tualsungum mipakhat cun a rel.

Ralkaptlan 2 cu zo pawl thawn an kopaw ti theih a si lo ih, mipi humtu ralkap pawl khalin atu ca kan ngan tiangah thuhla zianghman an suah hrih lo.

“Tuhlan khalah ralkaptlan an um dah ih an tlan veten thuhla zianghman an suah lo. Hmunhim an thleng hnu lawngah thu an than” tiah tualsungum cun a rel.

Kan dungkum khalah Matupi thuṭhenzung ih humvennak ṭuanvo latu ralkap/palik 3 cu meithal ralthuam famkim thawn an tlansuak dah zo a si.

Leave a Reply

Your email address will not be published. Required fields are marked *