SAC ralhraang in Matupi le Hakha karlak ah Khawmi 10 an that

2022, January 6 ihsin Matupi-Hakha ziinpi ah SAC ralhraang le CDF (Matupi) nasaten an kapaw ih ralhraang SAC ralkap pawl cun cuih ni ah Kihlung le Lung Hlaw khua karlak ah khawmi 8 an kai.

Zaanlam hnu khalah Kihlung khua ih datsii leitumtu khawmi pakhat an kai hlei ah, January 7 ah Ka se khua lam pantu khawmi 2 an kai bet tiah theih a si.

Cupawlcu ralphaw ah hmangin duhtawkin an soisa hlei ah mi 10 an that ih an ruak pawl cu an hlo ta ti`n January 9 ah CDF Matupi in thu an suah.

SAC ralhraang kut tuar khawmi 10 pawl lak ih kan hawl hmusun mi 9 pawl cu a hnuailam bangtukin an si.

1. Pu Tui Dim

A nih hi CNA/F ah ralkap ṭuanin cansauzet ram le miphun hrangah pumpeawtu a si. Media lam thawn pehpar khalin ram le miphun hrangah hnaṭuantu a si.

Chin Human Rights Organization khalah hna a rak ṭuan dah ih a thih thu thawn pehpar in CHRO cun “mawhphurtu pawl hrem an si thei nak dingah hmalaknak kan nei ding” ti`n thu an suah a si.

2. Pa Le Nang

Amahcu kum 13 lawng a si lai tiah an sim ih ralhraang pawl in Lam hruaitu dingah an kai hnu ah lamlak ah an that ta tiah theih a si.

3. Steven

A pa in a thih san hnu ah a unau 7 pawl le a nu zohkhen tubik a si ih minote a si nan innsangpa lungput nei in a sungte pawl kilkhawibiktu a si tiah a mah thawn naivaitu pawl in an rel.

4. Mamar Pa

Anih hi tuizarh sung, ralhraang kaihkhih tuar lakih thattuar 4nak a si.

5. U Va Htoo

Mara mi a siih fanau 7 nei a si. A nupi khal ralkianin hramlak ah a beu tiah kan thei.

6. Puhpa Sali

Anih khal Mara mi a si ih, tuṭum ah Matupi ih ralhraang kut tuar Mara phunhman 2 an tel tiah theih a si.

7. Pa Tinsan

Anih hi tumṭum, ralhraang thattuar khawmi 7nak a si ih Matupi peng, Kace khawmi a si.

8. Pa Lian Ngai

Fanau nei a si ih Boi Thia khawmi a si.

9. Pa Thak Lung

Lung Hlaw khawmi a si ih ralhraang kuttuar 9nak a si.

Hram : MRN

Leave a Reply

Your email address will not be published. Required fields are marked *