CDF hnen ih Meithal ngah sal duh ah Ralhraang ralkap in Khawmi 7 an kai

Chin ramkulh, Matupi ah ralhraang SAC ralkap in numi 6 telin Khawmi 7 an kai ih nasatakin an hrem tiah theih a si.

An kai nak san cu kandung April 21 ih ralkaptlan mipahnih in meithal 3 an tlanpi mi thawn a pehpar aw tiah an sim ih, kaihkhihmi tualsungum pawl an hrem natsat ruangah numi pakhat cu siizung tiang a thleng.

“Kan dung thlacem lam ah Matupi ih ralkap 2 in ralthuam famkim thawn CDF-Matupi hnen ah an apaw. Cumi thawn pehparin mi 5 lenglo an kai ti`n thu kan thei.”

“Atu ah Matupi ralkap umnak ah an ret ih an hrem natsat ruangah numi pakhat siizung ah a thleng tikhalin thuthang kan thei” tiah tualsungum mipakhat cun a rel ih, CDF-Matupi khalin cutin thu an suah ve.

CDF-Matupi thusuahmi ahcun “CDM tuahtu ralkap pawl ih apmi BA-72,MA-2,MA-3 meithal ngah thei saal beisei in ralhraang SAC ralkap in zinkong phunphun an hawl.”

“Cumi ngah duh ah khawmi kai tahratin nasaten an hremmi cu kan nih CDF-Matupi in kan dem rualin ralhraang pawlkom thawn ziangtik hmanah kan dawraw loding timi thu kan than duh” ti`n an tarlang.

Leave a Reply

Your email address will not be published. Required fields are marked *