Malaysia ih thi Chin nu ruak tlun pi mi cu Thantlang khua ah an luh siang lo +Video

Malaysia ram inn dot 9 ihsin tlak ruangih nunnak cem Chin fala Mai Sui Hlei Tial cu a suahsemnak Thantlang peng lam pan pi in a ruak tlunpi a siih Covid 19 boruak ruangah Thantlang khuasung ah lut siang lo in lamlak ah ruak vui in phum a si.

Mai Sui Hlei Tial cu September 29 ah vansiat thlak zetin a umnak Sungai Buloh khua ih inn dot 9 in a tlak ih a nunnak a cem.

A ruak cu Thantlang khua lam ih tlunpi tum a si ih Siizung lam ih ruak check fel nak an nei hnu ah Malaysia ih um rinsantlak Chin mi pawl tawlrelnak in October 2 ah Kawlram ah an kuat.

A ruak cu Myanmar ram ah tluangten a thleng ih a suahsemnak Thantlang khua pan pi cih a si.

Covid 19 boruak a si vekin Sui Hlei Tial taksa ah nathrik um maw/ umlo zoh fel thluh cia a siih Malaysia siizung le Myanmar embassy lam khalin Covid 19 nat in thi mi a si lo timi ca an ken cih nan Thantlang khua cozah nih a ruak cu khuasung luh pi an siang lo.

Sui Hlei Tial ih sungkhat pawl cu ruak thleng hlan ihsin Thantlang khua cozah le Covid 19 committee lam in an ko ih mithi te lam in thil umdan ṭha ten an sim thluh nan Khawsung luhpi an sianglo hlei ah Hakha khua hman ah na luh pi thei lo ding ti`n an rak sim.

Mithi tei` sungkhat unau lam cun Hakha ah feh in khuasung thuneitu hnen ih siangnak an dil hnu ah Mai Sui Hlei Tial ruak cu Thantlang lam pan pi a siih Thantlang cozah lam in khuasung luh an sianglo ruangah khuasung lut ṭul lo in Thlanmual lam pan ih phum cih dingin an dil nan Thantlang khua ṭuanvoneitu pawl in an siang lo.

Thantlang khua ṭuanvoneitu pawl cun lamlak ih phum nak ding hmunram an khih hmuh ih mithi tei` sung lam cun sianglo cingten cuih hmun ah an phum.

Mai Sui Hlei Tial ruak vui nak cu mi pali in ṭuanvo an lak ih an phum ṭheh veten Thantlang khua ṭuanvoneitu pawl in an pali ten Quarantine an lut ter cih tiah TheChinExpress media in a ngan.

Leave a Reply

Your email address will not be published. Required fields are marked *