Mai Sui Hlei Tial ruak cu Thantlang No-2 thlanmual ah ṭhawn fel a si zo

Malaysia ram inn dot 9 ihsin tlak ruangih nunnak cem kan unau Chin fala Mai Sui Hlei Tial ruak cu a suahsemnak Thantlang khua ah luhpi siang lo in lamlak ziin kap men ih an phum ter ruangah Chin mipi lung a kuai.

Leitlun hmuntinkim ih um Chin mipi in Thantlang khua uk ṭuanvonei pawl cu nasaten an sawi sel ih mipi aunak thawng in Mai Sui Hlei Tial ruak cu thlanmual pangai ah phum sal dingin biak rem aw a si zo ih, tu ah, Thantlang No-2 thlanmual ah a ruak ṭhawn fel a si zo thu theih a si.

Mithi tei` sung lam cun leitlun hmuntinkim ih um Chin mi pawl in Live rori ih zoh thei dingin sunvang ah a ruak phorhsal an beisei nan thu phunphun ruangah October 6 zaan nazi 10 luan hrawng ah a ruak phorh sal in Thantlang No-2 thlanmual ah an ṭhawn fel zo.

Aruak cu ṭhawn fel a si zo nan Thantlang khua uk ṭuanvonei pawl par ih Chin mipi thinhennak cu a dai thei cuanglo.

Upadi vek ih hmalaknak neiduhtu an tam
Chinram Sipin Upadi ah Thlanmual lawng ah ruak nan vui ding ti`n a um ih thlanmual a si lo mi hmun le ram ih ruak vui cu a malbik kyat 20,000 ihsin 100,000 kyat tiang cawh kuan lole thla 6 thawngthlak theih a si.

Chin mipi tamzet cun lamlak ziin kap ih Mai Sui Hlei Tial ruak phum dingih thusuahtu cu cuih upadi thawn thubuai tuahsakding an beisei ih a ṭul dan ih zir in hmalaknak nei duh khal an tamzet a si.

Leave a Reply

Your email address will not be published. Required fields are marked *