Lamzin ih feh men Chin mino 5 cu ralkap pawl in nazetin kut an thlak

March 21 zaan ah Hakha mino 5 cu ralkap pawl in nasa takin an thawi ih vuakthawinak an taksa pawl cu a vual thluh hlei ah kut ruh kiak khal an um tiah theih a si.

March 21 zaan, Carson Hall hmai ih duhphorhnak neitu mino ṭhenkhat cu inn an tlung lam ah Chin Ramkulh Cozah zung hmai in ralkap pawl in an rak kham ih “duhphorhnak neitu pawl an si” ti`n mino 5 cu an thawi ciamco hlei ah an kai lawk.

Ralkap pawl ih vuakthawi tuartu mipakhat cun “Carson Hall hmai ah meifar vangin duhphorhnak kan nei hnu, kan tlunglam ah lamziin in rak bawh mi a si. Cozah zung hmai kan thleng ah ‘duhphorhnak neitu pawl’ ti`n ralkap pawl in in thawi ciamco” a ti.

Ramsung media ṭhenkhat cun vuakthawi tuar mino 5 pawl hi ralkap pawl in an kai ih mino rual an pung khawmaw ciamco hnu ah an thlah leh sal tiah an tarlang.

Kawl ralkap in February 1 ih rampi cozah thuneihnak a la hnu in Myanmar rampumhuap ralkap tamzet cu duundaan mumal nei loin an puar thau ciamco ih thu mumal umlo khalin an duhduh in mi an kai ṭheu a si. (Lawrkhawm, Zuk – ChinWorld)

Leave a Reply

Your email address will not be published. Required fields are marked *