Lamziin Ceknak Leivawr in Apple Hmuan acres 23 siatsuah

Tedim peng, Dimpi khua lamziin ceknak ruangah Apple hmuan acres 23 a siat tiah theih a si.

Hih lamziin cu John and Joshua Company in Chin ramkulh DRD budget thawn Feb 25 ihsin an cek thokmi a siih leivawr ṭha te`n an hlon lo ruangah Apple hmuan sungah a tlaak ih Funuam khuami 19 pawl ih Apple hmuan Acres 23 a siatsuah a si.

Hih thuthawn pehpar in khuami Daw Cing Lam Dim cun, “hmuan zaten siat ṭheh khal an um ih a hrek hrawng lawng siat mi khal a um. A siatsuah mi cu acres 23 hrawng a si. Funuam khua mi pumcawmawknak ih hman mi Apple hmuan a si ruangah sungralnak tumzet a si. Curuangah cozah hnen ah bomnak dil dingin hmuan neitu pawl tongkhawm awnak an nei ih a ṭuldan vekin an tawlrel tum vivo ” tiah a sim.

Himi Apple hmuan cu Funuam khuami pawl in 1990 ihsin an rak tuah zomi a siih, kumtin Acres 1 ah a malbik Ting 10 tal an ngah ringring ti a si.

Apple hmuan pawl a siat thluh mi par ah Chin cozah in hmalaknak pakhat khat neisak dingin khuami pawl in an beisei tiah RFA cun a tarlang.

Leave a Reply

Your email address will not be published. Required fields are marked *