Lainatnak lungthin thawn Mai Sui Hlei Tial topi ṭanpitu an tam

Malaysia ram inn dot 9 ihsin tlak ruangih nunnak cem kan unau Chin fala Mai Sui Hlei Tial ruak cu Thantlang cozah le khuasung ṭuanvonei pawl ih phum ternak lamziin kap ihsin Thlanmual pangai ah felfaiten vui suak a si zo ih a thuanthu hin leitlun hmuntinkim ih um Chin mi pawl lung a tham zet ih a tantami sungkhat unau hrang ih bawmduhtu an tam vivo.

Chin ram duhdawttu leitlun hmuntinkim ih um Chin mi pawl in tohpi ṭanpinak thawn an bawm cio ih bulpak ih bawmtu le pawlkom zawng ih bawmtu khal an tamzet.

The Chinland Post tawlrelmi bawmnak

The Chinland Post in Mai Sui Hlei Tial ih tantami sungkhat unau ṭanpi nakah ti`n gofundme website hmang in leitlun hmun tinkim ih um Chin mi hnen ah bawmnak a dil sak ih tumtahmi US $5000 cu nikhat hlan ah a kim cih thei. Tu ah, TCP ih tawlrelmi bawmnak cu US $7353 a kim zo ih bawmduhtu hrangah October 12, Kawlram zinglam 11 tiang bawmnak pek a theih lai tiah thuthannak an nei cih.

Falam Christian Church of Indianapolis Inc lam khal in Mai Sui Hlei Tial riahsiatpinak ti`n sumsaw khongnak an nei ih October 8 zaanlamri ah tumtahmi US $ 10,000 luan ah $8000 hrawng an dong zo a si.

Falam Christian Church of Indianapolis Inc tawlrelmi bawmnak

Ziang ruangah Paisa an khong sak?
Miharsa sungkua an siih Mai Sui Hlei Tial cu a nauhak te lai in sungkhat unau cawm dingin Malaysia ah kuli hlawh dingin a feh.

Sungkhat unau cawmnak dingah harsa tuar in mi ram ah hna a ṭuan ih vansiatthlak zetin September 29 ah a um nak Malaysia ram inn dot 9 in a tlak ih a nunnak a cem.

Aruak cu a mah suahsemnak Thantlang khua ah phum dingin tlunpi a siih natnak ruangih thi mi a si lo timi Ca an keng nan Thantlang cozah le khuasung ṭuanvonei pawl cun Covid 19 boruak puhmawh in khua sung ah luhpi an siang lo ih rannung men bangin lamziinkap ah a ruak an phum ter.

Chin nunphung thawn kalhawmi miruak phum aw ter dan thu ah le rannung men bang ih lamziin kap ih ruak vui ter thu ah leitlun hmun tinkim um Chin mi pawl an lungawi lo ih Thantlang cozah le khawsung ṭuanvonei upa pawl cu Online ah nasazetin an soisel.

Chin media le mipi aunak thawng in Mai Suak Hlei Tial ruak cu Thantlang thlanmaul ah ṭhawn siang a si sal ih caan tawkmawi tawlrelnak an nei hnu ah a ruak cu tluang zetin an vui thei sal a si.

Hivek dinhmun a si ruangah Leitlun hmuntinkim ih um Chin mi pawl cun mithi tei` harsatnak an tong mi pawl cu tuarpi le riahsiatpinak langter in topi ṭanpinak an tawlrel sak a si.

Sumsaw thawn riahsiatpinak na lang ter duh le a tang link khi hmet aw…..
The Chinland Post tawlrelmi gofundme
Falam Christian Church of Indianapolis Inc tawlrelmi riahsiatpinak

Leave a Reply

Your email address will not be published. Required fields are marked *