Kum kimlo Nauhak zahmawh rimnam video zohtambik ah Mizoram tel ve

India pum huap in Covid 19 Lockdown caankhiah sungih kum kimlo nauhak nupasinak hmangpi lai video, tisa hairnak suakter theimi nauhak zuk zoh/hawl tambik pawl lakah Mizoram a telve ti`n Childline India Helpline cun a tarlang.

India Child Protection Fund New Delhi ih research nei nakih hmuhsuahmi a siih Lockdown thok hnu, a ninii in a zohtu an tam vivo tikhalin an tarlang.

Research tuah nakih hmuhsuahmi ah “Covid 19 boruak Lockdown thok ni in, ni 19 sungah nauhak tawkkherhnak, zahmawh lam ṭongkam thawn nauhak hmuhsuam, nauhak kutthlak, zahmawh lampang thawn nauhak blackmail tivek thawn pehpar ih bawmdilnak phone call 92,000 a um” ti`n Childline India Helpline cun a tarlang.

Hih thuthawn pehparin “Kum kimlo nauhak nupasinak hmang lai video le taksa hiarnak suakter theimi nauhak tleirawl zuk zohtu, Mizoram ih um pawl cun hmundang/khuadang ih zoh mi vekih lang dingin Virtual Private Networks (VPNs) an hmang tam zet” tiah India Child Protection Fund New Delhi ih hmuhsuahmi ah an tarlang.

Hih thuthawn pehpar mi ah Mizoram State Commission for Protection of Child Rights cun “Hivek, nauhak nupasinak hmangpi lai video zoh/hawl hmangtu le nauhak par ih thilsual tuahtu pawl cun nauhak pawl thawn nelaw dingin an bum/lem hmaisa. Cutin an bum thei hnu ah zahmawh hup thei fang thuamhnaw tivek hruk terin an zuk ih, cuih zuk hmangin neta hnu ah an blackmail ih an mai` duh mi an tuahter ṭheu. Curuangah hivek thil rapthlak thlenglo dingin kan fa le pawl umtlandan, internet hmandan tvp cu ne le pa in ṭhaten ngaihven a ṭul a si.”

“Hivek misual pawl in internet hmangin zahmawh rimnam tibuainak, tibuaitum an um pang le MSCPCR office phone number 0389 2314828/ 0389 2329587 lole CHILDLINE 1098 pawl ah report lohli dingin thu kan than a si” tiah Mizoram State Commission for Protection of Child Rights cun a tarlang a si.

Leave a Reply

Your email address will not be published. Required fields are marked *

error: hahahahahaha !!