Khuabawi/Venglal Kan Hril Tikah – တရားသူကြီး Salai Thawngpi

Khuabawi hi khuakom (Uksuh) hotu an si vekin hrekkhat khua ahcun khawte 4/5 kom hotu an si. Curuangah khuabawi hi thupi zetih kan ruah a ṭul. Khuabawi ka ti tikah khawpi sung ih venglal khal a huap cih ding.

2008 daanhrampi caang 289 ah khuabawi asilole venglal cu khawmi pawl ih upat hmaizahmi kha daan vekin hril ding a si tiah a um. Cule veng/khuakom uknak daan caang 5(d) ah mipi ih upat hmaizahmi a si ding tiah a um ve. Himi upat hmaizahmi timi hi kan mah le khua cio in ziangtin kan tah timi a thupi zet ding. Upat hmaizahmi kan hril maw, hrillo timi cu mipi par ih ṭhum aw ding mi a si. Mipi kan dinhmun langternak a si kan ti thei.

Khuabawi/venglal hnaṭuan ding hi veng/khuakom uknak daan caang 13 ah phun (31) a um. Himi phun 31 pawl a hman dan ding cu veng/khuakom uknak daan kalhmang (rule) ah a um thluh.

Cule daan dangdang ah khuabawi hnaṭuan tete bikhiahmi an um ih Leiram daan tla ahcun thuṭhennak tiangin thuneihnak a pek. Leiram thu khalah thupi zet an si.

Curuangah khuabawi kan hril tikah kanmai khua dinhmun lawng si loin kan Falam pengpi dinhmun tiang in zoh phah a ṭul. Ziangahtile Falam peng zate huap in Penguk in ukhruai hman sehla hna a ṭuantu taktak cu Khuabawi/venglal pawl an si. Khuabawi/venglal pawl in ziangtluk hna an ṭuan thei timi par ah Falam peng ṭhansonak a ṭhum aw ve.

Falam peng ah khawkom 84 lenglo kan um ih veng 14 lai a um. A zate kom ah 98 a si ruangah Khuabawi/venglal 98 lenglo kan nei ding tinak a si. Cule khawte lam ah mipum 40000 lenglo kan um ih khawpi pathum ah 18000 lenglo an um. Mipum 58000 lenglo hruaitu Khuabawi/venglal 98 hi mithupi zet an si.

Hitluk thupi a si mi Khuabawi/venglal kha a cang thei a si ahcun 2021 hrilawknak ah cun BUAIH ngah zo MINO pawl hmanin ṭuan thei ve hai sehla duh a um zet. Hakha khawpi ih veng pakhat venglal tla cu Monywa ihsin BUAIH ngahmi MINO a si ih mipi in an duh zet. Hna khal a ṭuan thei zet.

Curuangah a rei hlan ih tuah dingmi Khuabawi/venglal hrilnak ahcun mipi lam khal ralring zetin in hruaitu kan hril ding a thupi zet thlang. Kan ram cozah ih tangtabik dot a simi Khuabawi/venglal uknak hi thupi zetin ruat thlang uhsi.

Salai Thawngpi (Ramthlo)

Leave a Reply

Your email address will not be published. Required fields are marked *