Khua nu/pa Hotu ihsin Pu Hrang Lawm A Suak

Falam khua nu/pa hotu Pu Hrang Lawm cun a ṭuanvo laakmi ihsin a cawl thu March 4 ah amai` bulpak Facebook cahmai in mipi le a hnaṭuanpi pawl theihternak a nei.

Pu Hrang Lawm cun “Falam hrang ih ka ṭan rak lak ṭheu nak le tuihnu lam khal ih ti thei tawk ṭan ka tum nak pawl cu tui ṭum ih ralkap duhlonak ah ka mipum ka tel theilo ruangah le kaihkhih tong mi pathum hrang ih DC le palikbawi voihnih tongin kan hlawh tlin lo ruang ih zo hnen hman thei ter lo ten le mipi harsatnak tong lo deuh ding zawng ih ti thei tawk ṭan lak rero nak hmuah theih saktu nei lawn khaw lak ih zahsiah thangsiat in tumtu mi ṭhenkhat thil tuah mi ka riah siat nak ruangah tui ni in Falam Khua nu/pa hotu sinak ka cawl i duhdawttu le ka ṭuan pi zaaten in theih thiam hram ding ka lo dil” ti`n a mai Facebook cahmai ah a ngan.

Pu Hrang Lawm telin Falam khua nu/pa ṭuanvonei ṭhenkhat le midang pawl cu ralkap lam ṭang, CDM tha pe lo pawl tiah online ah ngantu theilo thangsiatnak ca a darh ciamco.

Cuih tlun ah tuizarh sung thotho ah an mah pawl i zuk cu lamziinpi hmun ṭhenkhat ah le cangdawl, thuthannak board tivek ah ben in thangsiatnak tuah a rak si.

Cuvek thu phunphun ruangah Falam khua nu/pa hotu Pu Hrang Lawm cun a ṭuanvo laakmi ihsin a cawl mi a si ih, thangsiatawknak tuahmi thu ah “kan mai` tuahmi a si lo. Kan nih cu ralkap uknak duh loin lamzawh duhphorhnak lawng si kan tuah” tiah Falam mino upa pakhat in a sim. (Chinland Herald Daily News)

Leave a Reply

Your email address will not be published. Required fields are marked *