Kawlram ih Lutduhtu Chin mi mipum 190 cu India ramri ah tang

Covid 19 boruak ah India ram ihsin Myanmar ramsung lutduhtu Chin mi mipum 190 hrawng an um ih cumi lak ihsin mipum 7 lawng kawlram ih lut theitu an um thu Tamu ပြည်သူ့လွွှတ်တော် palai U Naing Win cun a sim.

Amah cun “Laitlang lam ihsin kuat mi kawlram lut duhtu mipum caziin cu kan ngah. A cekci cun ka thei lo. Caziin kan neih cia mi zoh a si le mipum 190 hrawng cu an um. Cupawl lak ihsin mipum 7 cu kawlram ah an lut thei zo. A tang dang pawl cu ziangtik hrawng ah an lut thei ding timi sim theih a si lo. Kawlram lam in cu cohlangnak lamziin kan on zo. Rampi cozah hnen khalah kan sim thei zo ih thilṭulmi khal kan tawlrel a si” tiin a sim.

India ram ih um Chin mi tamzet cu tlaawng kai le hnaṭuan in an um ih, cu pawl lakih mipum tamsawn cu daanlo in India ram ih um an si.

U Naing Win cun “an dinhmun a bangaw cio lo. Daan thlun ih luttu an um vekin daanlo ih luttu khal an um ve. Cule, tlaawng kai ih umtu khal an um. Kan nih lam in cu kan co hlang thluh. Sinan, India cozah lamin an bawm theimi khal a um, nan, daanlo ih umtu pawl cu bawm danding a harsa. Kan nih lam in cu cangthei tawkin kan bawm rero a si” tin a sim.

Tuni tiang, Covid 19 ruangah India ram ihsin Myanmar ram ih tlungkirtu kawlram mi mipum 7,10,36 tiin a hranhran ten an um ih, Tamu ziin ih luttu pawl cu an zaten Tamu khua ah Quarantine lutter thluh an si.

ref : CW

Leave a Reply

Your email address will not be published. Required fields are marked *