Kawl ralkap in CDM luttu Palik tlan hawl in CNF camp an pan

March 10, CNF le Kawl ralkap thureltlangnak an nei hnu ah ralkap ukhruainak duhloin CDM luttu palik tlan hawlin CNF Victoria camp ah Kawl ralkap an feh tiah theih a si.

March 10 ih thureltlangnak an nei nakah CNF lam in Dothlengnak ih kaihkhih tuar pawl thlah sal dingin le lamzawh duhphorhnak nei rerotu mipi pawl hnaihnok/kai nawnlo dingin Kawl ralkap hnen ah dilngennak an nei ih ralkap lam khalin CDM luttu palik tlan pawl an kut ah ap dingin dilngennak an nei nan CNF lam cun an hnen ah an um lo thu le India ram lam ah an tlan sawn mi a si thu an sim fiang.

Nan, ralkap lam cun Thantlang peng ih CNF zung Victoria camp ah va feh thotho in Palik tlan thuhla sutciangnak an nei.

Hih thuthawn pehpar in CNF ih ṭuanvonei Salai Htet Ni cun “nidang ih an rat ṭheu vekin an ra ih CDM luttu Palik tlan pawl hinah an um tiah thuthang kan dong, kan kut ah ap uh in ti nan, kan lo pek theilo, a um khal an um lo ih cuvek pawl khal hih hmun ah kan cohlang lo tiah kan rak ti.”

“Cuhnu in an kirsal nan atu tiangah kan ram ah an um lai. Nan camp ah kan ra sal ding an ti nan ra nawnlo dingin ralrin kan pek” tiah a sim.

Chin ralkap CNF le rampi cozah karlak ah kapawnak nei nawnlo dingin lungkim hminkhennak an nei hnu ah hin Kawl ralkap pawl hi CNF camp ah simtheinak neita loin an rak feh dah. Nan, tuṭum cu Kawl ralkap in kumpi cozah thuneihnak an la hnu ih CNF camp i an feh voikhatnak a si. (Khonumthung)

Leave a Reply

Your email address will not be published. Required fields are marked *