Kawl ralkaap in Paletwa ih Caw 60 luan kaap that zo – Chin Human Rights Organization

Kaphnih ral ṭihphah in thinphannak hlir ih khat mi Paletwa kiangkap ih um khawmi pawl ih caw 60 luan cu Kawl ralkaap in an kaap that zo tiah CHRO in FB cahmai ah a tar.

Paletwa ih hmunkhuar kawl ralkaap Light Infantry Division (LID) 11 in tuhlan thla 1 hrawng ihsin Seint Sin Wa, An Kho Wa le See Hpa Laung khawmi pawl ih zuatmi caw 60 luan, mee le vok pawl cu nitin deuh thawn an kaap that ih rawl hmeh dingah an lak ṭheu tiin hmin phuang duhlo a hmun ih um mi pakhat cun a sim.

An duh zet in an kaap that ih a sung ril le an duhnak hmun sa pawl an lak ṭheu ih an duh lo mi pawl cu hramlak ah an hlawn men ṭheu tikhalin a sim.

Amah cun, “an duhduh tikah an ra ih kan rannung pawl an kaap that. Acaan le caw 1, a caancaan le caw 10 an kaap ih a sunglam sa le a thawbiknak sa pawl an lak hnu ah khawsung mipi hrang ah an tan ṭheu. Acaan le khawmi pawl hrang ah an tiih kan caw zuat mi cu an kaap that. Nan, hmum dang ih a sa zuar an siang lo”.

An rannung pawl duhtawk ih an kaap theinak cu khawsung mi pawl khawleng suak an kham ruangah hramlak ih caw an zuat mi pawl an kil theilo ruangah a si.

Amah cun, “hinah hmun kiangkap ih um khawmi pawl cu Paletwa khua ah zarh 1 voi 2 hrawng lawng an feh siang. Raltlan pawl khal an khua sung ah an kir siang lo. Inn ih an tanta mi fangfai le thlairah pawl va zoh ding khal an siang lo. Mihrekkhat cun kawl ralkaap in raltlan pawl ih inn ta fangfai khal an fir ṭheu tin an ti” tiah Chin Human Rights Organization hnen ah a sim.

Tatmadaw le Arakan Army (AA) buainak karlak ih tangtu Paletwa kiangkap ih um mipi pawl cu kaphnih ral pawl in vahsuah an kham ruangah ei-in ding nei loin harsatnak an tong ṭheu a si.

ref:CHRO

Leave a Reply

Your email address will not be published. Required fields are marked *