Kawl pawl ih Webulah Tlaang Lai Tummi Lungkimlo

Falam peng le Kalay peng ramri ih ummi Webulah tlaang ah Pho Lamin Tata company in lungmankhung (Chromite) liah an tum mi cu tualsungmi pawl in an lungkim lo.

Kalay peng Sita khua kiangih tlaang ah lungmankhung laih an tum ih hnaṭuan nakding thlam pawl khal an sak ruangah kiangkap khua 10 lenglo in an lungkim lonak hminkhen an tuah.

Cuih hminkhen mi thawn cozah hnen ah duhlonak langter an tum ih company pawl cun Chin ramkulh cozah ih siannak kan ngah zo tiah an sim tiin Sita khuami pakhat in a sim.

Hih thu thawn pehparin CNLD hotu Pu No Than Kap cun, “hih thu hi Sita khua pawl in, in sim ih minister Pu Mang Hen Dal ka hei sim theih tikah Chin ramkulh cozah in siannak an pe lo thu, daan loih hna an ṭuan ahcun thlawngthlak an si ding thu pawl i sim ih khua mi pawl hnen ah rak cohlaang lo dingin ka sim saal” tiah a sim.

Vui tlaang, Butlaak ah Chromite laih dingin ramleeng company tampi in hnaṭuan ngah an duh na`n an ṭuan ahcun an ngah mi ih hlawknak zaṭek 3% lawng Chin ramkulh ah a lut ding hlei ah leivawr hlonmi pawl ruangah thingram acres 10200, Natchaung ih Loram 3520 acres, Nat Myaung ih Loram acres 3200 le Htauk Kyait ih Loram 6700 acres lenglo a siat thei tiah Pianphung kilkhawitu pawlkom pawl in an sim a si.

via CH daily news
zuk – Lal Ro Hnun, Ngun Thawng

Leave a Reply

Your email address will not be published. Required fields are marked *