Kalaymyo : Inn ih um men pawl khal an him nawn lo

Tuizing, April 7 ih Kalaymyo doawknak ah mipi lam mithi 11 an um tiah theih a si ih cupawl lakih mi 3 cu KCA ralkap thawn pehparnak neilotu an si hlei ah hriamhrei keng khal an si lo.

Cupawlcu Hakhalay khuami U Van Ṭha Thang, Hmunlai veng ih um Tedim mi Pa Ngul Sian Pau le Wesley siizung ih hnaṭuan Pa Siama pawl an si.

U Van Ṭha Thang cu fanu 2 neizo a siih SAC ralkap pawl in KCA camp kiang Barani ceimawi awknak dawr le Salem biakinn karlak ih ziin ah an kap that. Aruak cu SAC ralkap pawl in zinglam nazi 10 hrawng ah an thair tiah a hmutu pawl in an sim.

Pa Ngul Sian Pau cu Kalaymyo, Hmunlai veng ih um a si ih AG kohhran a si. Zinglam vok rawl a pek lai ah SAC ralkap pawl in an kap that. Anih hi Kalay Civil Army thawn pehtlaihawknak an nei hran lo. An kap lai khalah hriamhrei ziang hman a keng lo tiah thuhla felfai theitu pawl in an rel.

Pa Siama khal KCA ralkap thawn pehtlaihnak neitu a si lo ih Fa 3 neizo a si. Wesley siizung ah cet kiltu dinhmun in zaan ih a duty hnu, zinglam inn a tlung lam ah SAC ralkap pawl in an kap that.

Hiti`n, mah poimawh nei ruangih suakvak le inn ih um men pawl khal SAC ralkap pawl in an kap that thotho tikah Kalaymyo ih um pawl cu inn i an um men khalle an him nawn lo tiah ti theih a si.

Leave a Reply

Your email address will not be published. Required fields are marked *