Kalay Myo ah Ralkap cangvai in Ṭan Hmun Thar an la

Kalay myo hmun ṭhenkhat cu March 28 ih ralpi a tho hnu March 29 zinglam ahcun thawmvang a um tuk lo nan, sun hrawng in kawl ralkap tapung pawl ṭan thar lakin hmun khuarnak an hawl tiah theih a si.

“Mipi lam in mizaan ih ralkham/ziinkham siat mi pawl remṭha in a thar in ṭanṭhat laknak an nei ve. Vengṭhenkhat ah duhphorhnak neitu khal an um ih ralkap lam khal khuasung hmunṭhenkhat cangvaihnak an nei reromi hmuh ding a um” tiah ramsung media ṭhenkhat tarmi le a hmutu bulpak pawl ih relnak thawng in theih a si.

March 28, Kalay myo ih kahawknak ah hriamhrei/humhimawknak tlasam ruangah mipi lam in miralṭha 5 an thi. Cumi ah Women For Justice ih hotu Falam suak Mai Dawt Hnem Sung (Aa Khu) telin Chinmi 3 pawl ih nunnak kan sung ih hliamhma tuar 20 hrawng an um.

Nunnak thaap in ralkap tapung pawl dotu Miralṭha kut tuar in ralkap lam mi 4 an thi ih 17 lenglo in hliamhma an tuar ve tiah a hmutu le ramsung media ṭhenkhat in an tarlang.

Kalay Myo ih um mipakhat cun “Mipi lam in mi ralṭha 4 ka sung lai ah ralkap lam khal kah that mi an um. Ralkap pawl cu dung an sip phah ih hliamhma tuar le mithi an tam mi hngirṭeu ah kaingkap naivai ih rak um men mipakhat cu an kap that. Cumi thawn mipi lam in mi 5 kan sung” a ti.

Atufang ah ralkap pawl cu a thar in ṭanṭhat lak tumin Kalay myo hmun ṭhenkhat ah cangvaihnak an nei mi hmuhding a um ti theih a si ih Wesley Siizung kiangkap khal ah ṭanṭhat lak tum in cangvaihnak an nei tiah theih a si.

Leave a Reply

Your email address will not be published. Required fields are marked *