Kalay le Gangaw mipi um lo seh la Hakha khualipi cu a tuar nazet ding?

May 2, Hakha ih doawknak a suak hnu, May 3 ah Hakha lam pan in SAC ralkap motor 10 luan an so tum nan Kalay le Gangaw ziin ih mipi in lamlak in an rak kap ih ralkap pawl cu feh suak thei loin an kir sal.

Cuvek boruak umlo sehla Hakha khuapi in a tuar nazet ding tiah boruak thlirtu pawl in an sim.

May 3 : Kalay-Ganaw ziin ih kahawknak

May 3 zaanlam nazi 5 hrawng ah Kalaymyo thlanglam peng 33 hlat ih um Saetaw khua kiang Nyaungchaung lilawn ah Kalay ihsi feh mi SAC ralkap rual le khuami nasaten an kap aw.

Kalay peng ih um mipakhat cun “Hakha lam ah ralkap mawṭaw 11 thawn so an tum. Gangaw an thleng ah kap an tuar ih an kir lam ah Nyaungchaung lilawn ah khuami (hriamhrei keng pawlkom) pawl in an rak nuai” a ti.

Mipi lam in Lai meithal, SAC ralkap lam in rifle hmangin nazi 3 sung an kapaw hnu ralkap lam dung an siip ih Kalay lam ah an kir sal ruangah zaan 8 hrawng ah kahdonak a tawp.

SAC ralkap lam ah mipahnih an thi ciang ih mipi lam khalah hliam tuar an um. Khuami pakhat cun mipi lam kaihkhih tuar
2 an um ih ralkap in mawṭaw cycle 8 an lak cih ti`n Irrawaddy hnen ah a sim.

Gangaw-Hakha-Kalay ziin ah Bomb puah tuar

Hakha so ding ih ruah mi ralkap mawṭaw 8 cu Gangaw saklam ih Hakha-Kalay ziinpial ah bomb an rak puah.

Gangaw khuami mipakhat cun “Local tuah cawp bomb siding zum a um. Cumi cu ralkap mawṭaw 8 an feh lai ah a puak. Mithi khal an um tiah thuthang kan dong. Tu ah, ralkap mawṭaw cu Gangaw ah a um. Hakha lam so tum mi si ding zum a um” ti`n May 3 ah Myanmar Now hnen ah a sim.

Hakha Doawknak
CDF – Hakha le SAC ralkap cu May 2 zaan in an kapaw thok tiah theih a siih cuih zaan ah ralkap lam 4 an thi tiah thuthang a suak.

May 3 zaan khalah Hakhathar lamziin tongawknak checkgate ah CDF lam in duty tu ralkap milai pawl an kap tiah thuthang a suak ih ṭuanvonei mipakhat cun “kan dilmi an thlun duhlo ruangah warning pek ṭhit phah in kan kap ih mithi 4 le hriamhma tuar 10 luan an um” tiah Mizzama hnen ah a sim.

Hakha ih kahdonak netabik cu tuizaan May 4, nazi 8 hrawngah a siih Innwa Bank kiang BOC ralkap hmunkhuarnak kiangih meithal puak thawm cu khuasung ah a thang zet tiah khuami pawl in an sim.

Kapawknak ah SAC ralkap pakhat a thi ih hliamhma tuar pakhat a um tiah Chinland Defense Force in thuthang an suah.

Tuhrihtiangah Hakha hrambun media le Chinland Defense Force Headquarter thusuah mivek asile Hakha doawknak ah SAC ralkap 9 an thi zo a si. Nan, SAC ralkap lam cun thihhloh thu tlangthannak an nei hrih lo.

Leave a Reply

Your email address will not be published. Required fields are marked *