Kalay kiangkap ih khua pawl an dinhmun a ṭha lo

Nikhat-hnih sungah Gangaw-Kalay ziin ih um khua pawl cu ralkap hraang pawl in an hroh nasatuk ruangah an dinhmun a ṭha lo zet ih khua suahsantu minung thawng leng an kim zo tiah theih a si.

Kalay khuasung ih ralkap le mipi an kapaw hnu in nitinten kapawknak a um ringring. Abikin, Kalay lam ah ralkap lut theilo dingin lamziin lailak ih rak dotu Gangaw-Kalay ziin ih khua pawl ah kapawknak a tam cuang.

April 1 ah Gangaw-Kalay ziin ih um Natchaung, Ngapha le Chaungkhuah khua pawl ah ralkap le mipi an kapaw ih Chaungkhuah khuami 3 le Webula khuami 1 an thi.

“Khua ah an ra lut ih mi an kap cih. An mah dodaltu khal an si hran lo nan, a rem an tinak hmuahhmuah an kap thluh. An kap that mi pawl cu inntang ih to men pawl an si. Chaungkhuah ah mi 4 an kap that. Pakhat cu nauhak kum 8 mi a si. Culocu kum 50 mi le kum 60 mi an si ih midang pakhat cu Webula khuami a si” tiah Chaungkhuah khuami mipakhat in a sim.

Cutiih ralkap hraang pawl an cangvai nasatuk ruangah khua suahsan ih himnak hawltu an tam. Tuisun April 2 khalah ralkap pawl in Tanphu khua lam an hroh ruangah 1000 hnakih mal lo khuami in khua an suah san.

“Mizaan lam ah ralkap pawl kan khua ah an ra lut ih mi inn khal an boh. Meithal an hawl in mi paisa khal an fir sak. Curuangah ṭihkhur cingih khua suahsan an tam. Tuisun khalah Tanphu khua pawl an buai. An khua ah minung 4500 hrawng an um ih 4000 hrawng in khua an suah san. Miṭhen cu Chinram lam ah an kai so” tiah Chaungkhuah khuapa cun a sim hrih.

Chaungkhuah le Tanphu khuami tamsawn cun an khua an suahsan ruangah, tuah, kum upa ṭhenkhat lawng an tang. Ralkap pawl Kalay lam fehtlang theilo dingin Kalay-Gangaw ziin ih um khuami pawl in ziin phit sak in nasaten an rak do ruangah cuih ziin tluan ih um khua pawl cu ralkap pawl in an bat cuang tiah Kalaymyo ih um mipakhat in a sim.

Amah cun “abikin Kalaymyo ah ralkap lut theilo dingin khuami pawl in thingkung tumpipi le lungto tivek thawn lamziin an rak kham. Kalaymyo ih ralkap pawl khalKalay-Gangaw ziin ah an suk ih lamziin khamtu khua pawl an kap cih. Mipi lam khalin neihsun hriamhrei hmang in an do ve. Doawknak hi Chaungkhuah khua lawngah si lo. March 31 ihsin Natchaung, Panchaung, Ngapha tipawl khalah an kap aw” a ti.

Kalaymyo kiangkap khalah hriamhrei neihsun hmuahhmuah suah in Mipi in ralkap pawl an do ih nasaten an kap aw.

Mizaan April 1 khalah kum 19 mi, Khaikam ih um Salai Van Biak Thang cu Kalay University kiangah an kap that tiah theih a si. (VOA)

Edit : Gangaw-Kalay lamthluan ih um Hakhalay, Sitha, Ngapha, Chaungkhuah, Natchaung, Tanphu le Aungchanth khuami zaṭek 80 cu khua suahsan in Chinram lam ah an kai so tiah The Chin Journal in a ngan.

Leave a Reply

Your email address will not be published. Required fields are marked *