Kaihkhih tuar mi 3 luatnak hrangah Pastor pawl cangvai rero

Falam ih lamzawh duhphorh ruangih kaihkhih tuar mi 3 pawl luatnak hrangah pastor pawl an zuam rero tiah theih a si.

Kaihkhih tuar mi 3 hrang hmalaknak nei dingin le tulai boruak ruangih harsa tuar pawl bom dingin Falam Christian Minister Fellowship (FCMF) cun rongbawltu 12 cu a hleice in ṭuanvo la dingah an hril zo a si.

FCMF hotu Rev. D. Vai Lian Zul cun “kan nau le kaih tuar pawl luatnak ding hrangah theih tawp in kan zuam rero. Chin ramkulh uknak council hotu le ṭuanvo nei pawl tong dingin khal Hakha kan feh zo. Cun thuṭhenzung lam ih a ṭulmi lawyer tivek khal kan biak ih kilkip in ṭan kan la khawm” tiah Chinland Herald Daily News hnen ah a sim.

Pastor pawl cun March 3 ah Chin ramkulh ukhruainak council hotu Pu Ngun San Aung hnen ah feh in Falam ih kaih tuarmi pawl luat theinak hrang dilngennak an va nei ih CNF ṭuanvo neitu pawl hnen khalah kaihkhih tuar pawl thlaksak lohli dingin ralkap hnen ih simsak dingin an va ngen.

Cuihtlun ah Pastor pawl cun thuṭhenzung ih feh dan vekin Kalay lam ih lawyer pawl khal sawm in ṭanpi dan an ngeih tuah rero tiah theih a si.

Falam ah tulai boruak ruangih kaihkhih tuar mi 7 an um thlangih, cu pawl cu 2020 election commission ṭuanvo nei mipali le February 28, lamzawh duhphorhnak ih kaihkhih tuar mi pathum pawl an si.

Salai Bawi Hlei Cuang, Pa Kyaw Kyaw le Pa Za Lian te pawl cu February 28 ih ralkap uknak dodal duhphorhnak ih Kaihkhih tuar an si ih an innsang pawl hrang khalah donhar le phurrit si lo dingin pastor le mino ṭuanvo neitu pawl in thuhla tawlrelsaknak an nei rero tiah theih a si. (Chinland Herald Daily News)

Leave a Reply

Your email address will not be published. Required fields are marked *