Kaihkhih tuar Falam mino pawl cu Voi 10nak Thuṭhenzung ah suahpi

2021, Dothlennak thawn pehpar ih kaihkhih tuar Falam mino pawl cu May 20 ah voi 10nak thuṭhenzung an suahpi tiah theih a si.

February thlacem lam ih kaih tuar Salai Bawi Hlei Cuang, Pa Kyaw Kyaw le Pa Za Lian te hrang ahcun thuṭhenzung voi 10 suahpinak a siih April thlalai hrawng ih kaih tuar Salai Cung Lian Mang hrang ahcun tuṭum hi voikhatnak a si.

Kaihkhih tuar Falam mino 4 hrangih Shih-ne ṭuantu U Ko Ko Ṭa cun, “Mang Kuk thu ahcu hmaisabiknak a si vekin tazacuaitu, tazacuai tuartu, Shih-ne pawl le thuṭhenzung bawi pawl meeting nak lawng a si hrih”.

“Culodang mino 3 ih thu cu district zungih an thlenmi zuk pakhat thu ah Daan thawn a mil aw lo ti`n kanmah lam cun elnak kan nei bet. Neta zungih an suahpi saal tikah thuṭhenbawi in district zungih thu cu a relfel dingih cumi hnu ah kan mah lam ihsin tetti pawl kan thunlut ve thlang ding” tiah Chinland Herald Daily News hnen ah a sim.

Kaih tuar mino 4 thuthawn pehpar in Chin ramkulh uknak council thawn neihhnaitu mipakhat cun “kaih tuarmi pawl hi a reihlan ah thlah thluh saal dingin thuhla a leeng thok rero thlangih cutikah kan naule pawl tla an tel dingah kan ruahsan” tiah Chinland Herald Daily News hnen ah a sim.

Thuṭhenzung cun June 3 ni khiah in thuhla relsak saalnak nei dingin a ko saal hai tiah theih a si.

Leave a Reply

Your email address will not be published. Required fields are marked *