Ka Sunmang Pakhat a Thleng Suak – Dr. Run Bik

Tuisun 2-1-2021 ni ah Falam town hall pi cu Falam mi ah Saya Van Kyi, MP Zun Hlei Thang,le kei, state minister 2 le state level officer 2 pawl in ribbon atcat in balloon pawl van ah kan thlah .Cule a thupi bik ah CM Salai Lian Luai in button hmet in a ong.

Laiphun ni an rak thawhnak hi hmun hi Mirang sanlai I ralkap zinzawh an zirnak drill shed an rak timi a si.20-2-1948 I Chin mi pawl hi tawk hmun ih an tonawk tum ah tui Chin state I Municipal minister Soe Thet I pa That Hliang cu hi meeting I tel dingin milai 30 lai hruaiin hi Falam town hall hmun ah Paletwa ihsin ke in ni 10 lai an ra feh. Hi tawk hmun hi kum 1958 hrawngah zipeng Kiam Sii cun acozah paisa le mipi hnen i khawnmi paisa in a tlun canphio khuh in innpi a rak sak. Kei khal in hi hall ah 1966 ah Kawl bicicope ka rak suah dah.

Cule lehhnu ah hi hall hi a phar tlakrawh tla in an run tuah. Cui hnuah kan dung kum 3 laiah zial tla cement concrete in an run tuah leh. Hihi sak that a sinak dingah March 2020 ah an run bal in tui innpi si dingin an run sak a si.

Aizawl ah Vanapa hall tha zet a um I kei tla Mizoram journalist sinak in Vanapa hall cu a sung a leng in ka rak hmu thluh. Cui ruangah Falam I town hall ṭha zet neih ding hi kan dung kum 30 lai isin ka rak sun mang theu.Kan ram ka ra tlun hlan isin ka rak ruat ring ring.Tui India bomnak I kan thawh hlan kum 2015 lai ah Hakha ah Kap Tial thawn tla town hall cu a hmun kelah sak siseh ka rak ti dah.

India embassy hnen I town hall ding kan dil hi Nun Phunti.inn kan dil hnu kum hrek hrawngah a si.Falam ka umlaiah India embassy cun ambassador Vikram Mishri Falam I a rat ding in hun phone.Hakha isi Falam a ra tlun lamah Zahau lam, Hualngo lam le Laizo lam pawl thawn Taungzalat zektaa ah kan rak hmuak.Rawl kan eipinak ah an mah nupa le Sittwe I Indian consulate pa,minister Pau Lun Min Thang le kei cu cabuai pakhat ah in to tir. Vikram Mishri cun town hall hi cu kan lo bom thei ding I ti. A thai zing an tlun hlanah town hall hmun in zohpi. Himi hnu ah Falam construction dept. I engineer pawl I design le proposal an suai mi cu Vikram Mishri Rangoon a suahsan hlan ni 3 khel ah Rangoon ah ka pe man.

Himi hnu April 2019 ah CM Salai Lian Luai in town hall kan dil thu ah harsatnak ziang maw ziang maw a um I Cui tlun ah town hall thuah thum ding hrang i Ks.ting 10000 kan dil mi tla Union Border Affairs Minister Lt Gen.Ze Aung in a hrekah ṭhumaw in ti Ks.ting 4900 ah kan ṭhum ti tla in sim.

Hiti vek harsatnak a um cingin CM Lian Luai cun Falam hrangah a run zuam ciamco. Tuah inn dot 3 saknak ding ah state acozah paisa Ks.ting 3500 a run hawl bet I,Cui tlun ah ka rak dilmi Nun Phung innpi hnak in kum 1 in kan hmu tlai ding tiin ka rak ruahmi tla Falam I chief minister kan neih man ah tuikum rori ah kan nei thei a si hi.

Town hall kan neihtheinak dingah Falam khaw nu khaw pa pawl an thupi zet. Hmin lang I tarlang dingi thupi zet dang pakhat cu Falam vuanthawk bawi Ca Awi hi a si. Vikram Mishri rak hmuah nak pawl,lam thiam hawlnak pawl ah a thupi zet. Cui tlun ah kum 2010 kum I Saya Thawng Bik pawl thawi Falam town hall I Falam ṭhansonak an rak rellai khal ah Ca Awi hi town hall thar sak a ṭul rak titu bik pawl a si.

CM Lian Luai hohanak I Falam town hall thar nei thei dingi kan ṭan rual vek in Falam pawl kan tan rual cun hna tam pi kan ṭuan thei ding.

Town hall on ni I thusim vuangyi Soe Thet cun hi town hall hi Falam ta lawng a si lo. 1948 I Paletwa I si Falam I ra ka pai hruaimi mi 30 lakah miphun 6 lai an tel I Paletwa I um Rakhine tla an tel. Cui ruangah hi hall hi Laimi phun phun I ta a si a ti.

zuk:Piang@photography

Leave a Reply

Your email address will not be published. Required fields are marked *