Ka Pi Na ThuThu Si Seh – Pu Khuang Lian Sum

2008 Constitution section (8) nakah Kawlram picu Pyidaungsu System ih tuahmi a si tiah a nganih, Pyidaungsu Hluttaw pahnih in Parliament House ih an thu neih theidan pawl leh State member leh Central member karlak ih thuneih theinak zemawk dan siseh, State Hluttaw ah ram uk theinak (Excutive Power) nei theiding in Government khal a hran ten ret a siih, State sungah thubuai relfel theinak (Judicial Power) khal a dangten pek a si.

Asi nan hi Pyidaungsu Hluttaw leh State Hluttaw sungah 25% cu mipi ih hril lomi Ralkap ih direct retmi pawlin an kaihrem thluh haiih, Cui Pyidaungsu Cozah sungih hmun pawimawh Defence ministry, Home ministry, le Border Affairs ministry pawlhi ralkap ih kaih mi an si.

Cumi ih hlei ah Constitution Section (417) nakah Kawl rampi siatthei ding khawpih thubuai a um a si len President in Security Council thawn reltlangin emergency thuthan (Declare) a tuah thei tiah a ngan, Himi umzia cu a fiangdeuh ih kan sim a si le Ralkap in Cozah tohkham a long thei tinak a si.

Si ee. NLD unau pawl ih hrangkhal ah ningzah ding leh huatding a umlo ih,Rohingya thubuai ruangah Kan Pi Suu Kyi cu International Court of justice (ICJ) hmaiah Ralkap run in a va ding ticu Leitlun zapi hmaiah phatding a umlo ih, Cu ruangah ICJ hmai ih Pi Su Kyi a va din nakhin hi, Constitution Section (8) sungih Pyidaungsu Hluttaw leh State Hluttaw Cozah fehdan ding pawl Ralkap 25% in an pahbal ih an Uk bet nak leh Constitution Section (417) nak pawlhi Pi Su Kyi in A pawmpi, A lungkimpi, A remtipi, ih a nem hngetsak tinak a si.

Cu ruangah NLD unau pawlin CNLD leh Ralkap an kawpaw tiih,zanvar Arhla fingkhat an sakih Belraangsia an vuak hicu a ringzet nan,Laiva ah nga kaih duh in hru an vua ih runva lamah nga an rakdap tivek thawn a bangaw umzia neilo auaw men asi.

Aw lee, zawi ngaimawh thu lo ah kan unau NLD pawlcun Divawng phurbangin midang thawmvang theilo in an mai feh awnthawm lawng an thei ih, Kan unau Tlangpar dangmi pawl ziangtlukin an ṭhangso ih , ziangtluk in an miphun leh ram an kilhim ih, ziangtlukin an dingsuak timi an hmuhban lo ruangah, Kan ram leh miphun dinsuah nakding Policy relding theilo in Divawng phurphah in Lamzin in hlohpo rero lai a sihi.

Cu ruangah Chin miphun leh ram ṭhansonak, him damnak, dinsuahnak lamzin hmutu leh theitu, A ngaihnak thei leh thiam Chin Party Cerlian ninu bangin a tlang rero thlang , Chin miphun lungrual kutkai aw ten miphun damnak CNLD Inn pi sungah lut uhsi.

Chin Pacangtha, Na Inn sungsangah thu an nei thei maw?
Chin pacangtha Na te fa na humhim ngam maw?
Chin Pacangtha Na khua leh na mipi na humhim ngam maw?
Chin pacangtha Na miphun leh ram tlunah thu na nei ngam maw?

Pu Khuang Lian Sum (Canada)

Leave a Reply

Your email address will not be published. Required fields are marked *