Ka fahniang cu “A Ram Hrang Ah Nun A Hlan Ram Dai Ah”

A NUN A HLAN RAM DAI AH

Za Ar khuang khalin a ṭhang thei nawnlo maw ka cawi hrinhniangte cu. A nui zaṭial dawm lo men in, doral misual rual pawl cun an zalh men aw Ram dai ah a cui ka thin.

Dairial na can zawnah, na lungsirte talin sunghno ka nu khuiah na um? ti`n i hlam keicu maw… Ka fahniang.

Zaankhua rung maw miarmo in, na zuat bawh-ar pawl cu lawi zai an rel, riahbuk an pan. Na zuun an phur tel. Asinan nangcu ziangtik hmanah lawi zai na rel nawn zik silo maw… Sungkim tei duhthu kan samnak kan run-inn cu, run dai ah na can ter.

Ra kir sal aw fahniangte ti`n na zuuntham na Pa thawn ka au. Kir zai na rel nawn silo maw. Thih ṭih lo men bangin ram duhdawtnak ruangah Ralṭhat na suah. na va pacang em. Ka fahniang.

A nui mit zohin aa liapli te kha, Pacangṭha Cungte ti`n hmin dai nawn loih kawh na si thlang ding. na sunglawi tuk hokhaw maw Cungte.

Na feh ni ihsin na ra tlun sal ding hngakin ni le thla cu na Pa thawn kan siar thawk. Kan siar sung a va reilo em. Kan siar khawplo. Mawhthluk co lo NiThla catar lamlam hi kan mawhthluk thul.

Cuti ih ni le thla kan siar rero laiah cun zanmang hmanih ka ruah banlomi na thu thawmthang sia cun i deng” na fahniangte cu Ram hrangah a nun a hlan ti in.

AI zaw… ka Arsi cu vanlaizawlin a tla kuai ta maw…A CUI KA THIN” ti`n ka au, ka mitthli cu vanrialruah bang a sur. Mulemal nei thiamlo in ka khawsa…

Cungte, khuanui zarah miralṭha rual na hawi le pawl cu, nikhat ni ni ah nehnak thantar thawn an ra tlung leh lai ding. Cui caan ah na rauthla talin rak thlun tlung ve awla maw.

Sunloih phu miralṭha val rual pawl hi kan sunloih ni a thleng lai ding. Na pheikhai pi na rual le pawl cu an sungkhat unau thawn lungawinak mitthli biangah luang phahin an pawm aw ding. Ngai awknak thu an hlan aw ding sikhaw. ka zoh ngam lo ding e kei na nu mivanduai hin.

Cui caan ah na hawi le hnenah Ka fahniang Cungte a tel ve maw? ti`n ka sut phiarpho kei ih, hi tin in sawn kei cu maw … “Na fahniang Cungte cu a Ram duhdawt ruangah a nun a hlan RAM DAI AH ” ti`n.

Ka ngai ngamlo…ka ruat thiamlo ka fahniang…na rauthla te cu kei na Nu hin Pangpar ṭhi thawn ka lo hmuak ve ding maw. Kan ngaiawknak thu tla kan ruah aw kei cu …

Ka rak hngakhlap bikmi cu maw Cungte, Nehnak co ih na ra tlun tikih, nan raldonak hmunih na tawn teh mi, na riahsiatnak le, lungawinak thu siseh, na raldo dan pawl leh, kan ngaiawknak thu tintian diriam takih kan Sungkim tei ruahawk khawm ding hi na Nu hin hla bang ka rak sak nan sikhaw maw.

Kan Biak Pathian thangthat dingin, mi cu an Sungkua ten Biakin lam panin an feh ding, ka zoh ngam ziklo ve.. kan kim nawnlo, kan fahniangte Cungte a tel nawnlo ve” kan ti ding. Cui caan ah Sunghno na Nu maw, na Pa sawn ha maw lileng deuh ding.

Cungte, na taksa cu leidai ah ria-ral men khalsehla, Ram na duhdawtnak lungput leh, Ram hrangih pacangṭha na sinak na hmin hi a dai nawnlo ding san khuk tiang. Miralṭha Cungte Pacangṭha Cungte ti`n…

Ṭahnak um nawnlo nak hmun Van khawpi nuam ah, kan sung zaten kan tawng-aw ding maw Cungte. Cui hmunah cun ṭhenawknak hrimhrim a um nawnlo ding. Cungte mangṭha mangṭha ….

Ka fahniang cu “A RAM HRANGAH A NUN A HLAN RAM DAI AH”

**Cicin Bawithang in Paralṭha Salai Cung Nawl Piang ih Nu, Nu Thiam hrangah a ngan mi a si…

Leave a Reply

Your email address will not be published. Required fields are marked *