Israel ram ih Falam Tlawngta pawl Harsa tong

“Ramat Negev International Training Centre fo Advanced Agriculture” program thawn Israel ram ih Ciinthlak fimnak zirtu Falam tlawngta pawl cu Covid 19 boruak ruangah tlung thei loin harsatnak an tong thu theih a si.

Covid 19 boruak lockdown ruangah khuasung lam khal ah an vak thei loih ṭulhai pawimawh hrang ih paisa suah ṭul caan tivek khalah an harsa zet.

Harsatnak an tong mi thu thawn pehpar in Israel ram ih tlawngkaaitu Salai Ṭha Van Thawm cun, “Lockdown mi hi a harsabik si ko. Khuasung tla kan feh thei lo. Paisa suah ṭul caan tivek a harsa, ṭhehle, Covid a thok pek ah khuasung kan feh le Asia mi cu in thleidang caan kan tong phah ṭheu. Program a cem zo nan kan tlung thei lo ih course pakhat cu in tuah sak saal ih kan kai, October thla tiang si ding. Bawmnak cu zianghman kan ngah lo” ti`n CH Daily News hnen ah a sim.

Ei-in le umnak thu thawn pehpar in, “Himi program hi tlawng lamin umnak tivek cu in pek lo. Milian pawl hnen ah hnaṭuan bawm phah, in ret ih kan um. Ei-in lam le umnak lam cu kan pu le pawl ih tawlrelnak tang ah kan um. Cun, hnaṭuan kan bawmmi in kan ngahmi paisa kha tlawng khuan ah kan hmang” ti`n Salai Ṭha Van Thawm cun a sim.

Hih Ciinthlak program cu thla 11 program a siih Falam khuasung in mipum 3 (nu 1 le pa 2) an rak feh. Kum 2019 August thla in cuih program cu an rak thok ih, kum 2020 June thla ah an ṭheh zo nan Covid 19 boruak ah tlung thei loin an tang mi a si.

Hivek boruak ruangah Falam an tlung duhzet nan an tlung thei hrih lomi thu thawn pehpar in “Tlung tla kan peih, kan hair tuk thlang. Mah umnak tlukin a nuamnak um fawn lo tik ahcu, ziangtik kan tlung thei ding ticu a fiang thei hrih lo. Thailand lam Airport le an phit rero lai tikah” ti`n Salai Ṭha Van Thawm cun CH daily news hnen ah a sim.

Leave a Reply

Your email address will not be published. Required fields are marked *