India palik in ID Lem hmangtu Chinmi 14 an kai

India ram ah daan loin lut tu Kawlrammi minung 14 cu vanzam ticket lei nakih an hman mi Aadhar cards (ID) Lem thawn September 30, sun nazi 2 hrawngah Iphal Airport ah palik in an kai tiah theih a si.

Airport ih palik ṭuanvonei mipakhat cun “Indigo vanzam thawn New Delhi ih zam tum an si. Tulihal International Airport (Bir Tikendrajit International Airport) ihsin Guwahati, Guwahati ihsin New Delhi ti`n Delhi lam pan tum an si ih Aadhar cards Lem an hman mi thawn kan kai ngah mi a si” tiah Manipur hram bun TSExpress thuthang hnen ah a sim.

Kaih tuar Kawlrammi pawl cu nunau pakhat le nauhak pakhat telin mipum 14 an si ih airport palik in a ṭul dan vekih hmalaknak nei dingin Singjamei palik kutsung ah an ap fel zo tiah kan thei.

September thla thok lam khalah ID lem hmangtu Kawlrammi mipum 26 cu Guwahati ah kaih an tuar dah a si.

Aadhar cards (ID) hi kutzungṭial mit ṭial tivek tiang check thluh ih tuah mi ID a si tikah a Lem hmangtu cu olsamten thei an theih.

Tuṭum kaih tuar Kawlrammi 14 pawl ih khua hmin cu Manipur thuthang in a tarlang lo nan ramsung thuthang ṭhenkhat cun Tedim le Tonzaang khuami pawl an si tiah an tarlang.

Leave a Reply

Your email address will not be published. Required fields are marked *