Htilin khua kiangah Chin tlangval 2 That tuar

Gangaw peng, Htinlin khua luan ah zo a si ti theih lomi kut tuar in Chin tlangval 4 soisa an tuar ih mi 2 an thi tiah theih a si.

Salai Cung Zung Thang, Jonathan, Tha Nge le a rualpi pakhat cu Haa tuah/rem thiam an si ih Magwe ramṭhen khua kip ah vakin Haa tuah ṭheu an si.

May 4, Htilin khua luan ih SAC ralkap le khuami kahawknak kiangah thleng pang in kaihkhih an tuar ih Salai Cung Zung Thang le Jonathan cu an nunnak tiang a cem phah.

Oh-hlah khua ih pastor saya Van Uk Thang cun “Htilin khua luan ih SAC ralkap le mipi kahawk lai thawn tongaw pangin an pali in kaihkhih an tuar. Salai Cung Zung Thang le Jonathan cu an that ih meisa thawn an urkang” tiah The Chin Journal hnen ah a sim.

Thihkhat luat Tha Nge le a rualpa khal cu hliamhma nazet tuar le biak theih loding khawp in an besia tiah Pastor Van Uk Thang cun a sim hrih.

Tha Nge le a rualpa thu ah Oh-hlah khuami hminthup pakhat cun “Tha Nge hi hliamhma besia zetin tuizing ah Oh-hlah khua ah a ra thleng. Cun, a rualpa hi a thi ruat in an tan ta. Nan, rak thi loin kiangkap naivai khuami in hliamhma thawn an rak sar ih khua lam in phone hnu, tuisun ah kan va hruai” tiah The Chin Journal hnen ah a sim.

Tha Nge le a rualpa dinhmun hi besia zet si in theih a si ih Pastor Van Uk Thang cun “biak theih khal an si lo. Cun, siattong Cung Zung Thang le Jonathan tei` sung topinak hi tui zaan ah kan tuah” a ti.

Atufang Htinlin kiangkap boruak hi a sosang zet lai ruangah Soisa tuar rualvahli hi zoi` kut tuar an si tikhal theih felfai a si hrih lo.

Jonathan, Tha Nge le a rualpi pakhat hi an thuhla cipciar theih a si lo ih, Salai Cung Zung Thang cu Lungraang khuami si in le a nu le pa hi Oh-hlah khua ah an vai nak rei zet zo si in The Chin Journal in a ngan.

Leave a Reply

Your email address will not be published. Required fields are marked *