Hruaitu mino 5 kai dingin palik in ca an suah

Dothlennak ih mipi hotu lam deuh cu ralkap cozah in rampihuap khua tin deuh thaw ah kaih dingin thu a suah thok thlang.

Cumi ah Hakha palik khalin Dothlen cangvaihnak ih hotu lam mino 5 cu kai dingin March 13 ah an hmin le zuk pawl an pholang.

Cupawl cu
1. Salai Ngun San Aung
2. Dr. Biak Cung Lian
3. Salai Van Tin Lian
4. Salai Elishama
5. Ni Ceu (Meithat Officer) pawl an si.

Mino hruaitu lam deuh kaih ciamco an tum mi thu thawn pehpar in Hakha hminthup upa pakhat cun “Kan mino cetcangdan hi ralkap cozah lam in an ṭih thok ti cu a fiang tuk rori”.

“Tidai zit, Mitthli tlak bomb tivek hmangin thei tawk suah in ralkap lam in mipi an ṭhit nan mino/mipi ralṭha pawl cu dungsip tum cuang lo in ralkap ukhruainak cu an dodal sinsin. Cumi ruangah an cangvaihnak hi dingderter tumin tuvekin hruaitu lam deuh an kai thoktum hi a si” a ti.

Kaih dingih thusuahmi mino 5 zuk pawl cu Hakha khua hmuntinkim ah an tar ih an mah pawl khal kai cih tumin an hawl thok tiah theih a si.

Rampihuap hmun tamzet khalah hruaitu mino deuh batin palik lam in kaihkhih theinak ca an suah tiah ramsung media ṭhenkhat in an tarlang.

Falam khalah March 12 ah hruaitu mino pahnih kai theih nak ca an suah tiah theih a siih palik lam cun “kaih an si hrih lo ruangah an hmin cu kan thup hrih” tiah an phuang.

Leave a Reply

Your email address will not be published. Required fields are marked *