Hriamhrei tello, Ralkap thusuahmi ruangah Chin ralkap mino nunnak cem

Meithal hriamhrei thawn mipi nunnak an lak mi cu tanta hrih in, Kawl Ralkap thusuahmi ruangah Chin ralkap mino pakhat nunnak liam zo …

Paletwa peng Sami khawmi, CNF ralkap ṭuan rero lai senhnih Salai Aung Lin Tun hi pumlam ṭhalo ruangah vei 2 rori operation nei zo a si ih Hakha Siizungpi ah thla 1 lenglo tuamhlawm zomi a si.

Myanmar ralkap cun March 12 ah Chin ramkulh Hakha khawpi, Falam le Tedim ih cozah siizung hnatuan CDM teltu pawl cu cozah inn quarter ihsin an dawisuak thluh ih Hakha sizung ahcun damlo besia pawl khal dawisuak thluh an si.

Cumi ah kum 26 mi Chin ralkap pum lam damlo besia zet cu Hakha siizung ihsin an dawisuak ve ih March 13, tuizing nazi 5 ah a nat tuarlo in a thi.

Hakha siizung ah hin mina 20 luan zohkhen in an um ih an zaten ralkap pawl in an dawisuak thluh. Cumi ah Chin ralkap Salai Aung Lin Tun a tel ve ih lenglam ah duhvekin an enkol theilo ruangah a nunnak a cem phah hi a si.

Salai Aung Lin Tun ih ruak cu CCRP zung, Chin Oo Si veng ah an ret lawk ih March 13 zing nazi 11 hrawngah hunserh caan hmang in Hakha No. 1 Thlaan ah an vui liam tiah theih a si.

zuk : THT

Leave a Reply

Your email address will not be published. Required fields are marked *