Hngakṭah le Ngolvei enkolnak hmun ah Covid natnei 500 luan rori an hmu

Mizoram, Aizawl, Muanna veng ih hngakṭah le Ngolvei enkolnak hmun ah Covid testnak an nei cu natnei 500 luan rori an hmu.

Thutak Nunpuitu Team timi hngakṭah le Ngolvei enkolnak hmun ah Covid nat a karh tiah thuthang a suak ruangah June 20 ah state cozah in nat testnak an va nei ih minung 500 luan rori`n Covid nat an nei mi an hmusuak a si.

“TNT (Thutak Nunpuitu Team) ah midamlo 280 luan an um ih ngolvei, hngakṭah le hnaṭuantu thawn mipum 1000 luan an um. June 20 ah mipum 1099 nat zohnak an nei ih Covid nat nei 547 rori an hmu” tiah TNT ih ṭuanvonei mipakhat cun TZT hnen ah a sim.

Mizoram ah June 20, nikhatsung lawngah Covid mina 662 an hmu ih, cumicu Covid a karh hnu nikhatsung mina hmuhtambik record thar a si.

Tudinhmun ah Mizoram ah Covid 19 nat nei 4132 an hmu zo ih cumi ah minung 83 an thi zo tiah theih a si.

Leave a Reply

Your email address will not be published. Required fields are marked *