Hakha peng ih SAC ralhraang Keneh ṭhenkhat

Hakha-Matupi lamtluan ih kahawknak a suak hnu in cuih hmun vuakvel ah SAC ralhraang nasaten an cangvai ih, Senthang peng ih um khua 8 ihsin raltlan 6000 hrawng an um phah thluh.

May 31 ah Thlanglam laitlang Matupi ihsin Hakha lam panmi ralhraang mawṭaw cu Hakha – CDF in lamlak in an rak kap ih cuih ni in Hakha-Matupi lamtluan ah doawknak a suak.

Hakha – CDF le SAC ralhraang doawknak cu a nasa zetih ralhraang lam in ralthuamtum hmangin khua kiangkap an kap nasa ruangah Senthang peng ih um khuami pawl cun Inn le Lo suahsan in hramlak ah beunak an hawl.

Raltlan pakhat cun “Kan khua kiangkap ah doawknak a suak ruangah khuami tamzet cun Inn le Lo tansan in hramlak ah beunak kan hawl. Meithal puak a ring hlei ah ralhraang lam in kan thei dah lomi meithaltum an kap ciamco tikah kan thinphang zetih thawmvang ringtuk taakah miṭhen cu an ṭap” a ti.

Doawknak a nasazet ruangah Surkhua telin Hakha le Matupi karlak ih um Senthang peng khua 8 ih mipi 6000 lenglo cu himnak hawl in hramlak ah an relh.

Khuami umlo lai cu SAC ralhraang in caanṭha ah laakin khawsung ih zuatmi ṭilva siseh, mi inn khal boh in an duhmi thli an fir hluahhlo.

“Dinlaupa khua ih tawhkalhmi inn ṭhenkhat phei cu SAC ralhraang in an boh ih Thiamtahlaimi khal an siat sak. Sangkate thlalang khal an khuai tam zet. Pumcawmnak hrang ih Ṭilva zuat mi caw, vok, mee le ar tivek khal duhtawkin an fir, an that. Inn pakhat tla cu an fangfai bung sakin lamziin khalah an darh sak thluh” tiah Senthang peng ih raltlan pakhat cun a ti.

Surkhua khalah mipi umlolai caanṭha ah laakin SAC ralhraang in dawr ṭhenkhat an boh ih innzuat ṭilva khal duhtawkin an fir, an that sak. Khuami pakhat cun “Amalbik dawr 6 an boh. Ar 60 hrawng le Vok 3 an that” a ti.

Tudinhmun ah Senthang peng ih doawknak cu a dai zo nan raltlan tamzet cu SAC ralhraang ṭih ah an tlung ngam hrih lo.

Sakta khuami mipakhat cun “tucu inn ah kan thleng zo. Mah le inn cio ngaihsakṭul a si tikah innhnen, venghnen boruak khal kan ngaihven man/thei lo.”

Kan nih khua hi kir hmasalam kan si. Khua dang khal kirsaltu an um zo ding zum a um. Tlannakhmun bangawlo cio kan si tikah khua thawn peng 1-2 hlatnak ih tlan pawl cu kan kir sal zo. Ralhraang pawl an tlan zo ti`n thuthang kan dong ruangah kan kir ngam sal hi a si” a ti.

Hakha-Matupi karlak doawknak ah SAC ralhraang 8 thi in, Hakha-CDF lam ah nunnak liam 1 an um tiah theih a si.

  • Senthang peng ih SAC ralhraang Keneh ṭhenkhat

Senthang peng ih SAC ralhraang Keneh

Senthang peng ih SAC ralhraang Keneh

Senthang peng ih SAC ralhraang Keneh

Senthang peng ih SAC ralhraang Keneh

Hausen Khua ih SAC ralhraang Keneh

SAC ralhraang in Senthang peng ih innzuat ṭilva an fir lai

Leave a Reply

Your email address will not be published. Required fields are marked *