Hakha-Thantlang ziinpi ah Suamawknak rapthlak a suak

Hakha le Thantlang karlak ziinpi ah misual pathum in U Aung Aung paisa ting 17 an long tiah theih a si.

U Aung Aung cu kum 32 mi a si ih Thantlang ah leiba a cawh hnu, a tlung lam ah hivekin vanduainak a tong mi a si.

January 16 ih thilthleng a si ih, hih thuthawn pehpar in Thantlang palik bawi U Than Lwin cun “a tu hi zingzoinak kan nei rero lai. U Aung Aung paisa longtu misual pathum hi Thantlang lam maw Hakha lam ah an tlan timi kan thei ciang lo. Amah U Aung Aung khalin a thei lo.”

“Khawi hmun an pan timi theih a si lo ruangah zingzoidan a har deuh men thei. Asinan, Tikir palik le Hakha palik thawn hnaṭuan tlang in zingzoinak kan nei rero. U Aung Aung in a paisa longtu pianhmang a simmi vek hmuihmel neitu kan hawl lai ih kan hmu a si ahcun thusut zingzoinak kan nei ding” tiah The Hakha Times hnen ah a sim.

U Aung Aung cu Irrawady ramṭhen ih ra mi Kawl miphun a si ih Kunya le khaini zuar in pumcawm awmi a si.

“2021, January 16 ah Thantlang ih leiba a cawh mi kyat 100,500 le a mah bulpak paisa keng in Hakha lam pan in a kir sal.

Thantlang in peng 9 hlatnak hrawng a thleng ah Lai ṭong hmang mipathum in lamziin an rak kham. Ziinkap ah an hruai ih tape aire thawn a kut le ke an ṭon hnu ah a ka khal tape thawn an phit sak. Cuhnu ah a paisa ting 17 an long” tiah Thantlang IPRD nih a tarlang.

Hih thu thawn pehpar in Thantlang peng palik zungin (pah) 3/2021/pukma 392 thawn thubuai an tuah ih thuhla umdan le misual pathum hawl in zingzoinak an nei rero a si.

Leave a Reply

Your email address will not be published. Required fields are marked *