Hakha peng doawknak ah ralhraang ralkap 5 an thi : Salai Htet Ni

Tuni, July 30 ah Hakha ihsin Timit lam pantu ralhraang ralkap le Chin ralkap pawl an doaw ih kahdonak ah ralhraang ralkap tuar na in mi 5 an thi tiah CNA ṭuanvonei Salai Htet Ni in a rel.

Ralhraang ralkap hi tuhlan Chin ralkap pawl ti siat mi Timit Lilawn don sal dingin poksuak an si ih mizaan ah Hakha khua leng ah zaankhat an riak.

“Lilawn don nak ding thilri pawl thawn Thlanmual kiang Tlang ah an riak ih, tuni an poksuak sal hnu ah Chin ralkap pawl in an do” tiah Salai Htet Ni cun a ti.

Zuk Hlun : Chin ralkap pawl in Timit Lilawn an puah siat lai

Ralhraang ralkap hi thazaang 40 hrawng si in, zinglam nazi 11 hrawng ah kahdonak an ṭan ih Khawsung lam ihsin ralthuamtum thawn an kap bawm nan, tu hrih tiang thuthang suak dan ah mipi ralkap lam ah hriam tuar an um lo.

Doawknak ah ralhraang ralkap tuar na in zaanlam nazi 3 kim zik hrawngah Khawsung lam pan in an kir sal tiah thieh a si.

Tu dinhmun ah Hakha le Thantlang karlak ah ziangtiklai khalah kahdonak a suak thei ruangah Lo tuah pawl siseh khualtlawng suakso pawl khal, Hakha-Thantlang zinpi zawh lo dingin thu an thanaw a si.

Leave a Reply

Your email address will not be published. Required fields are marked *