Hakha : Mipi hmai rori ah vuakvelh a tuar hnu ah kaihkhih a si cih

2021, March 10, Hakha lamzawh duhphorhnak ih mipakhat cu ralkap le palik in mipi hmuhhngan rori ah an vuak an thawi hnu ah mawṭaw ah phur in an kai cih.

Amah hi zo a si tikhal theih a si lo ih an kai lai hmutu mipakhat cun “Mizapi hmai ah an vuak an thawi hnu ah an kai. An vuak nakah a lungfimlo in a um. Cuticing in mawṭaw ah lut terin an hruai cih” a ti.

An vuak thawinak hmun hi Hakha Myanmar Economic Bank hmai ah a si ih zaanlam nazi 2 luan hrawng ah a si.

Palik le ralkap ih kutthlak lai hmutu mipakhat khalin “an ṭhuat nasa tukih lungfimlo in a um a bang. Ziinpi khatlam ah ralkap an um ih khatral ah zo hman feh thei lo dingin palik in an kham. An vuak thawi lai cu kan hmu rero nan cangngaihnak a um lo” a ti.

An kai hnu ah upa ṭhenkhat in an va ngaihven nan “Ralkap lei nih kan kai mi a si lo” tiah an rak sim. (Lawrkhawm)

remsalmi : Amah hi lamzawh duhphorhnak ih telve mi a si lo. Laamzin ih a feh lai ah an kai mi a si.

Leave a Reply

Your email address will not be published. Required fields are marked *