Hakha Minister Quarters in Meithal puak thawm a thang

Hakha, Hniarlawn lam ih um vuanci quarters ihsin April 23, zaanlam nazi 7 kimzik hrawng ah meithal puak thawm a thang tiah khuami pawl in an sim.

Khuasung um pawl cun SAC ralkap lakah hmu aw thiam lonak a suak ih an mah le mah an kapaw tiah an sim ih mithi khal 3 an um tiah theih a si.

Meithal puak thawm voi 10 luan a thang hnu reilote ah Ambulance in a va pan cih tiah an sim ih cuih mawṭaw cu nazi 1 hnu hrawng ah a kir sal ti a si.

Khuasung um upa pakhat cun “Ralkap pakhat nih a ralkappi/palik pahnih a kap ih cu hnu ah amah ten a kap aw ve. A kap mi mipahnih cu a hmun rori ah an thi cih. Amah khal a hliamaw nazet. Athi ding maw dinglo ti cu a fiang lo” tiah a sim.

Zaanthim hnu ih thilthleng a si ruangah le meithal puak thawm a si ruangah khuasung um pawl in an va pan ngam lohlilo ih thuhla umdan cipciar theih a si hrih lo.

Asinan, mithi 3 an um ti cu Hakha Harhdamnak lam ih hnaṭuan mipakhat in The Chin Journal hnen ah simtheinak a nei tiah thu kan dong.

Leave a Reply

Your email address will not be published. Required fields are marked *