Hakha le Thantlang ah Palik le Ralkap nasaten an cangvai

Tuizarh ihsin thok, saklam Chinram khua ṭhenkhat ah kawl ralkap le palik pawl nasaten an cangvai.

Abikin Hakha le Thantlang khua pawl ah cangvaihnak an nei luar ih, March 27 zaan nazi 9 luan hrawngah Thantlang Centenary Baptish Church Pastor Ngun Thawng Lian telin Thantlang ah mi 4 an kai. Mino pawl in va runsuak an tum nan meithal voi 3 an kap ruangah dung an kir sal.

A hmutu mipakhat cun “Pastor Ngun Thawng Lian inn an luhhnawh ih Thantlang Youth Association zung khal an bauh” a ti.

Ralkap le palik pawl ih kaimi mi 4 cu TCBC Pastor Ngun Thawng Lian, Pu Ṭial Cung, Pu Ṭial Ceu le a fapa Van Hmun Sang pawl an si.

Thantlang mino suak khawm in kaihkhih mi thlah sal dingin an nor tum nan ralkap pawl meithal kah sian nak an pe zo ruangah mino pawl cu mah le inn cio ah an kir thluh sal tiah The Hakha Times in a ngan.

Hakha khuapi sung hmun ṭhenkhat khalah March 27 zaan nazi 7 luan hrawng in ralkap le palik pawl in mi an bawh ih an keng mi fung thawn mi khal an thawi tiah theih a si.

Vuak tuartu mipakhat cun “Leng ka suak ih Cherry ziin ah ka motorcycle in rak kham. Ka kheel ah voikhat in vuak. An sim mi ahcun a ra mi pohpoh, kan dingter nawn lo ding. Kan kap thlang ding in ti. In kham lai ah Motorcycle pahnih an ra ih an kham ve. Asinan, an tlan lohli ih ralkap le palik pawl cu an thinheng tukih meithal thawn kap an tum nan an kap man lo” a ti.

Cuhnu khalah ralkap le palik pawl cu Cheery ziin le Khuathar BOC kaingkap hrawng ah an vak rero.

27 March, tuizaan nazi 8 luan tiang hrawng ah cun Hakha khuasung ah kaihkhih a tuar mi an um lo tiah The Hakha Post in a ngan.

Leave a Reply

Your email address will not be published. Required fields are marked *