Hakha Khualipi hmunhnih ah Chin PhunPi Ni Hmang Tum

Hakha : Kum 2021, February 20 ih tuah dingmi avoi 73nak Chin PhunPi Ni cu Hakha khualipi hmunhnih ah tuah an tum tiah theih a si.

Hmunkhat cu kawl ralkap dinmi Chinram cozah thar hohanak in tuah an tum ih, Hakha hrambunh Chin Nunphung pawlkom khalin a hranten Chin PhunPi Ni an tuahtum a si.

Hih thuthawn pehpar in Chin Nunphung pawlkom ih ṭuanvonei mipakhat cun “Ralkap kuthnuai ih hnaṭuan Chinram cozah hotu Pu Ngun San Aung in an mah thawn tuah tlang dingin in sawm ko. Nan, kan cohlang lo. Asan cu hminthatnak lakthluh an duh ruangih sawmmi kan si tiah kan ruat ruangah a si. Curuangah Chin PhunPi Ni cu tuhlan ih kan timlam cia vekin a hranten kan tuah ding” a ti.

Tuhlan ahcun Hakha khuanu/pa aiawh in Pu Ngun San Aung hi lungawi thusimtu dingih rak ruahremmi a si nan`n kawl ralkap pawl ih hnaṭuan sawmnak a rak cohlang ruangah Chin PhunPi Ni ih caan ropi hmangtuding cazin khalin a hmin an hlonhlo a si.

Chin Nunphung pawlkom hohanak thawn tawlrel a simi voi 73nak Chin PhunPi Ni tuahdanding thuthawn pehpar in “kan nih cu, tulai boaruak thawn online i thusimnak le hlasaknak tivek thawn lawng caan hmang kan tum. Zaanlam nazi 2 hrawngin Online ah kan live ding. Cumi ah Vuanci rak ṭuantu Pu Ram Mang le Mino lam in CHRO ih Program Director Mai Thin Yu Mon in caan an hmang ding”.

“Cun, hlasak mallai a um ding. Cuvek hrawnghrang lawng si ko. Cuhman cu tulai boruak thawn mi soiseltu an tam zet. Asinan Chin PhunPi Ni rori tuahlo i umding cu rem kan ti lo ruangah tuvekin timtuahnak kan nei mi a si” tiah Chin Nunphung pawlkom ih ṭuanvonei mipakhat in The Chinland Post hnen ah a sim.

Ralkap dinmi Chinram cozah hohanak thawn tuah dingmi Voi 73nak Chin PhunPi Ni cu Feb 20, Zinglam nazi 10 ah tuah an tum ih caan hman nakah Pu Ngun San Aung in ralkap bawi Min Aung Hlaing ih cakuat (ta-wun-hlua) siarnak a nei ding tiah The Chinland Post in a tarlang a si.

Leave a Reply

Your email address will not be published. Required fields are marked *

error: hahahahahaha !!