Hakha kahdonak thu ah CDF ṭuanvonei mipakhat annka

Hakha : May 3 ih meithal puak thawm a thang mi thuthawn pehpar in online ah ca phunphun a suak ih mipi tiang kan lung buai zik phah thluh.

Hakha Chinland Defense Force in SAC ralkap an do tiah thuthang a suak ih ralkap 4 thi, hliamhma tuar 10 luan an um tiah ramsung media ṭhenkhat in an tarlang.

Chinland Defense Force Heaquarter khalin SAC ralkap 4 an thi ih 10 luan hliam an tuar tiah Facebook ah an tarlang.

Ralkap thi an um timi thu ah miṭhenkhat cun thuthang diklo a si tiah an sim ih ralkap lam khalin thuthang an suah lo ti`h ṭanlatu khal an um.

Hih thuthawn pehpar in thuhla felfai thei duh ah Mizzima in CDF ṭuanvonei pakhat hnen ah pehtlaihnak a nei ih phone thawn an biakaw mi cu a hnuailam bangtuuk a si.

Hakha Chinland Defense Froce ṭuanvonei mipakhat cun “May 3, zaan nazi 11:20 in 12 karlak hrawng ah kan mah nih kan va kap hai. Cumi ah thuthang kan suah vekin mi pali an thi ih hliamhma tuar 10 lenglo an um.”

“Palik/Ralkap Sakhaan cu kan lak tum lo. Mipi an ti duhdah tuk hi kan zoh theilo ruangah si. Khualtlawng sukso paisa an dil ih, miṭhen si le ziinpi ah totuupin an petter (phakhung) ciam co. Cuvek a si tikah, warning pek nakah kan ṭhit mi si. Kan duh cun Sakhaan kan lak sak thei nan kan lak duhlo” a ti.

Atufang Hakha boruak thuthawn pehpar in “tufang cu a dai zet ko. Va kap tum ringring khal kan si cuanglo. An cangvai dan ih zirin kan cangvai tum” a ti.

Mindat vekin kaphnih biakawknak teh a um maw timi ah “kan nei lo. Kan mah lam in Daan kan suah ih cumi an thlun duhlo ruangah kan va kap mi si. Cun, kan mah lam cu kan him lai. Hliamhma tuar kan um hrih lo” a ti.

Leave a Reply

Your email address will not be published. Required fields are marked *