Hakha kahdonak ah SAC ralkap 5 an thi tiah thuthang suak

Nikhat-hnih ah kahdonak a suak ding tiih ruahhngannak a rak um cia vekin 2021, May 2 ah Hakha khuapi ah SAC ralkap le Hakha CDF ralkap (Chinland Defense Force – Hakha) an kapaw thok.

Hakha, Cawbuk veng ah khuathim nasi 6 luan in an kapaw thok ih SAC ralkap lam ah amalbik mi 5 an thi tiah thuthang a suak.

CDF – Hakha cun tuhlan nikhat luan zo ah SAC ralkap hnen ah theihternak nei in ralrin an rak pe cia zo. Theihternak ca ahcun “May 2 ihsin thok, daite ih duhphorhnak neitu mipi kai lo ding, hriamhrei hmangin mipi suam lo ding, May 2 tiangih kaihkhih tuar hmuahhmuah thlah zaleng ding” ti`n an ngan ih “May 1 zaanlam nazi 4 tiang dilngenmi nan tuahlo asicun CDF – Hakha in a ṭul cun kahdonak kan ṭan ding” tiah an tarlang.

CDF – Hakha ca suah mi cu SAC ralkap lam in ziangah siar loin an um ruangah tuvekin kahdonak a suak hi a si.

Thunet kan theih mi ah kahdonak a dai sung tiah theih a si ih ziangtikah kahdonak an ṭan sal ding ti cu mipi lam in thinphang zetin an thlir a si.

Leave a Reply

Your email address will not be published. Required fields are marked *