Hakha innkaang ah Mi 6 Nunnak Liam +Akaang thokdan le Sunral zat

Hakha : 2021, February 2, zinglei 5 luan ah Dillo veng um Pu Hrang Cung le Pu No Hnin inn a kang ih mi 6 nunnak a liam.

Electric rawlsuannak saluan nakin a suak thokmi kangmei a si tiah Information and public relations department, Hakha in a tarlang ih meikang ah Pu Hrang Cung fale 5 le a nau ih fa 1 an thi a si.

Inn kang thuthawn pehparin inn neitu Pu Hrang Cung cun “Nidang ahcu zinglam nazi 3 hrawng ah ka tho ih rawl ka suang ṭheu. Nan, tuizing cu ka ithmu a thaw tukih ka tho theilo. Kan uico a bo nasatuk ruangah ka ṭhang fangfang. Ka lungfim ciah cu meikhu ka rak haak zo.”

“Tho zangzang uh ti`n ka au ciamco i kan nu cu a tho man. Sangkate thlalang ka khuai ih ka fale pahnih cu innleng lam ah ka deng suak man. Kan nu thawn kan tlansuak man fangfang. Ka fapa Amon Bawi Chit Htoo cu kan dung baite ah motor nih a pah i a ke kiak ruangah a tlaan ve theilo. Ziangtin meisa a kang thok ti khal ka fiang ciahlo” tiah The Hakha Times hnen ah a sim.

Meikang cu veng hnen pawl ṭanrualnak le Hakha meithat pawl ṭangkhawm in khawvang hnu ah an phal suak thei a si.

Meikang thokdan le sunralmi thu ah “an inn hi dot 3 a si. A dot hnihnak ah hin electric hmangin rawl an suang ṭheu. Curuangah electric ruangih kangmi a si ti cu a fiang ko. Cun thilri sunralmi man kan ṭuat thei sun cu kyat 264,000 hrawng a si” tiah Hakha meithat zung ṭuanvonei Pu Thain Nuam Maung ih The Hakha Times hnen ah a sim.

Innkang pakhat sawn cu Pu No Hnin inn a si ih, amah hin inn pahnih a nei. Anmah umnak inn cu a him nan mi an luah termi cu a kangral ve. An inn hlangtu hi Lo ah an riak lai fang a si ih inn a kang lai ah inn luah an um lo tiah theih a si.

Innkang ih nunnak liam miparuk cu Par Tha Hlei (kum 17), Ngun Sui Par (kum 14), Amon Bawi Chit Htoo (kum 11), Ngun Cin Hniang, Ngun Tha Len (kum 7), le Samuel (kum 19) pawl an si. (IPRD Hakha, The Hakha Times)

Leave a Reply

Your email address will not be published. Required fields are marked *