Hakha ih Crusade tuah tu Evan le Inteekpa Thawng Tlak

Hakha, Cawbuk ih Crusade tuahtu Evangelist le Crusade tuah nak inn neitu cu Covid 19 boruak ih thlun ding mi Daan pahbal thubuai orh ter in Hakha palik in an kai.

Leisen Cawbuk ih um Pu That Kung tei` inn ah Evangelist Van Ni kaihhruainak in Crusade an tuah ih inn hnen kiangkap khal in an tel pi.

Minung hnihthum um khawm ti cu, an thawmvang khal a ring deuh ih Covid 19 boruak thinphang um cia thawn, Khuabawi le upa ṭhenkhat in tuah nawn lo ding in an fial.

Crusade cu zarhpi zaan (September 20) tiang tuah ding ih sim than aw mi a siih September 21 zaan ah an tuah peh bet ruangah Hakha palik minung 11 hrawng in zaan nazi 10 ah inntek pa Pu That Kung cu an kai.

Pu That Kung cu a thaizing september 22 ah an thlah saal nan, September 25 ah Hakha palik in Evan Van Ni thawn an kai saal lala ih Thawnginn ah an khum.

Covid 19 boruak ah mi pung khawm in um tlang lo ding timi thubuai thawn an kai mi a siih Pu That Kung le Evan Van Ni cu Octoer 2, Hakha Thuṭhen zung ah lai rel sak ding an si tiah ChinJournal cun a ngan.

Leave a Reply

Your email address will not be published. Required fields are marked *