Hakha ih Bomb puak hnu, Mipi Lung luahkhat zettu Thuhlapi Pakhat

June 5, Hakha ih bomb a puak hnu, mipi lung luahkhat zettu thu pakhat cu “Hakha Thar” timi facebook account hmangin ca an thlah mi hi a si.

Ca tarmi cu “Myanmar pumhuap Siizung le Tlawnginn tivek ah ralhraang pawl in kuttuah bomb le keypad phone hmangin caankhiah bomb an puah ṭheu ruangah cuvek bomb an tuah lai fang ah puakkuai dingin ramsung phone operator pawl in nazi khuai dan ah message voikhat kuat dingin June 5 in hmalaknak an nei thok. Hnimsin – keypadphone thawn kop mi caankhiah bomb cu message a lut tikah a puak kuai ṭheu” tiah a tarlang.

Hakha Thar timi cu zo a si?

Hakha Thar timi fb account neitu hi Mandalay mi si in a tarlangaw ih Hakha khualipi ah 2021, May 9 ah ceer thok vekin FB info ah a ngan.

A ca post dan kan zoh tikah SAC ralhraang dungthlun si in a lang ih ca a share sawng sinmi khal mi tihrimnak deuh hlir an si.

Cun, Hakha Thar fb cahmai thawn pehpar in thusutding maksak a um mi pakhat cu a profile ih canganmi “ပျူစောထီးအဖွဲ့ (ဟားခါး)” timi hi a si.

ပျူစောထီးအဖွဲ့ timi cu zo an si?

Myanmar rampi a buai hnu, tubai hrawng khan ပျူစောထီးအဖွဲ့ tiaw in rampumhuap hmun hranhran ih cangvainak neitu pawlkom pakhat a suak. Cupawl cu uniform khal hruk lo, pangai sinfen thawn meithal kengin mi an kai ṭheu.

Tuini tiangah ပျူစောထီးအဖွဲ့ thawn pehpar mi thu felfai hmuh ding a um lo nan internet cahmai ahcun “pinsin lakzo tatmadaw pawl, USDP party ṭhenkhat, Patriotic Association of Myanmar party ih sungtel ṭhenkhat le mipi lakih tlangleng Dalan pawl an si tiah thuthang a suak.

ပျူစောထီး cangvaihdan theiciangtu ka si tiawtu mipakhat cun “an nih hi kan ram akeelte awh thei dingin SAC ralhraang ih hmanfung thupi pakhat an si. Pinsin zo le atuih tatmadaw ralkap ṭuan lai siseh, mipi lak khalah sungtel an nei. CRPH le NUG cozah dodaltu an si hlei ah biaknak thawn pehpar in buainak suak dingin mi tawtawk an hmang. Pangai sinfen hrukin an cangvai ih Lukhuh, hmaikhuh bun in meithal thawn an duhduh dan in an cangvai ih a duh tikah mi an kai thei” a ti.

Pro-democracy activist U Myo Yan Naung Thein khalin ပျူစောထီး thawn pehpar in “SAC ralhraang in an hmang ṭangkai zet. Mipi thawn buainak a um tikah ralhraang pawl cun a mawi nakah ti`n dung an siip sak. Asinan, culailakah ပျူစောထီး pawl cu mipi lakah an tanta. Palik in Dandun zawngin cangvai theinak an nei mal tikah ပျူစောထီး cu dunglam in cangvai tuding ah an hmang. Mi an kai ter. Lamzawh duhphorhtu an kai duh tikah palik le ralkap an hmang nawn lo. ပျူစောထီး an cangvaiter.”

“Khin Nyunt san lai ih thuneihnak ထောက်လှမ်းရေး pawl an pe thluh bangin tukhalah ပျူစောထီး pawl thuneihnak an pe ve tiah kan thei. ပျူစောထီးအဖွဲ့ ah ralkap pinsin zo khal an tel ih မဘသ, USDP le Dalan an tambik tiah an sim. Meithal hriamhrei an pe ih an batter bikmi cu mipi humhimtu ralkapbu pawl an si.”

“Cuvekin daankalh ih cangvaitu an si ruangah kan nih မြန်မာနိုင်ငံလုံးဆိုင်ရာ အချုပ်အခြာအာဏာ ကွန်ရက် in an thuhla nasaten kan zingzoi ih Public justice system hmangin Daantatnak kan nei tum” tiah RFA hnen ah a sim.

Hakha bomb puak le ပျူစောထီးအဖွဲ့

June 5 ih Hakha kungsung voithum bomb puak ah CDF sungtel mino Salai Phun Sang Zathang, Salai Tial Chawn le Salai Lai Kulh Thang te pathum in nunnak an can.

Bomb puak lai ah meithal kap thawmvang a suak ti`n thuthang a um ruangah le Hakha ah ပျူစောထီးအဖွဲ့ an um tiah thuthang a suak ruangah bomb puak dan thuhla felfai theiciang dingin CDF lam in zingzoinak an nei rero tiah theih a si.

Bomb puak hnu ah SAC ralhraang nasaten a cangvai ih nunau telin khuasung um mipum 40 lenglo an kai tiah khuami pawl in an sim.

Leave a Reply

Your email address will not be published. Required fields are marked *