Hakha ah Mipi ralkap le ralhraang doaw, Internet le Phone line ṭhenkhat phit

Chin ramkulh, Hakha peng, Timit lam ihsin meithal le bomb puak thawm a thang thu, Khawmi pawl in an rel ih nazi 1 sung hrawng cu thawmvang a thang.

“Tuni July 26, zaanlam nazi 4-6 karlak hrawngah Khua leng lam ihsin doawk thawm a thang. Hakha khawsung ihsin ralkap mawṭaw pakhat a poksuak bet. Doawknak ah an va bawm tum siding zum a um” tiah tualsungum mipakhat in ramsung media hnen ah sim.

Doawktu hi zo pawl an si ti cu fiangfaiin theih a si lo nan, Khawmi pawl cun ralhraang ralkap le Chin ralkap pawl an doaw siding an zum thu an rel.

Doawknak a um rualin zaan lam hnu in Hakha khawsung biakpawh a theih nawn lo ih ralhraang ralkap in phone le internet line an phit siding tiah zumnak a um.

Ramlengum mipakhat in “Kahdonak boruak a um hnu, sungkhat unau pehtlaih ka tum ih phone number pangai in siseh internet line khalin ka biak thei lo.”

“Khaw dang ih um sungkhat unau cu ka biak pop thei nan zaanlam hnu in Hakha khawsung biak a theih lo. Khuaruah har za a si” tiah a ti.

Ramsung thuthang pawl khalah Hakha khawsung biakpawh a theih lo thu tarlang a si ih zaanlam nazi 8 tiangah phone le internet line a tlangh thei lo tiah thuthang kan thei.

Edit : Phone line ṭhenkhat in Khawsung biak theitu an um tiah thuthang kan thei.

Leave a Reply

Your email address will not be published. Required fields are marked *