Falam peng, Covid Dokhamnak hrangah ṭan thar an la thok

Falam peng sung ah Covid natnak a karh cak hlei ah June thla sung lawng ah Covid natnak thawn mi 4 an thi zo.

Cuvek dinhmun a si tikah Covid-19 pulhnat Dokhamnak hrangih pumpe awtu mino thazang lawng si nawn loin CRCDF khalin Falam Covid Volunteer thawn hnaṭuan tlang dingin a thar in ke a kar thok tum tiah theih a si.

CRCDF hruaitu pakhat cun “Falam ih Covid-19 pulhnat Dokhamnak hrangah CRCDF in Falam Covid Volunteer pawl thawn hmunkhat te’n țan kan laak tlaang thlang ding. Covid thawn pehpar in CRCDF ah zo cio in, in pehtlaih thei ringring” tiah Internet cahmai ah tlangthannak a nei.

Falam peng ah May thlacem lam in Covid mina thar an hmu thok sal ih May 19 ihsin June thla lai tiangah Covid nat nei 200 lenglo an hmu zo.

Covid natnei lakah June 2 ah nupinu pakhat, June 12 ah mi 2, June 13 ah kum upa pakhat ti`n June thlasung lawngah Falam peng ah Covid natnak thawn thimi mi 4 an um zo a si.

**Hminsin : CRCDF (Chin Relief-rehabilitation and Community Development Foundation) cu khuarel siatton, harsatnak a tongtu pawl ttanpinak, tunding salnak hrang le zatlang tthansonak hrangah dinmi pawlkom a si.

Leave a Reply

Your email address will not be published. Required fields are marked *