Falam : Palik kut ah Meithal ap lohli dingin Ni khiah sak

SAC ralkap cozah cun April thlacem, Mindat ih kahdonak a suak hnu in Chinram khua ṭhenkhat ah license neilo meithal palik kut ih ap lohli dingin thuthannak an nei tiah theih a si.

Falam peng sungih license neilo meithal pawl khal May 10 netabik ah retin palik zungah ap lohli dingin cozah zung lam in Khuabawi/Venglal pawl hnen ah thuthannak an nei.

Hih thuthawn pehpar in Chinram ih um hminthup mipakhat cun “Tuhlan ihsin an rak than cia mi cu a si ko. Nan, Mindat kahdonak ah mipi lam in ralkap an that tamtuk ruangah an thinphang si in a lang.”

“Mindat ih thilthleng vek suaksal nawnlo dingin lamziin an hawl ih mi an nawt ciamco si ding zum a um” a ti.

Falam peng sungih license neilo meithal ap ding an timi ah Air Gun, Lai meithal le Zunphir tipawl a tel ih Uktu lam ih nikhiah mi hnu ih license neilo meithal koltu cu kaihkhih tuar thei dinhmun an si.

Ralkap cozah lam in hitiih, meithal thawn pehpar ih hmalak neinak an nawt ciamco cu Mindat kahdonak ih ralkap 20 luan an thih ṭum vek le rampi hmai ah hriamhrei ṭha nei sawn nan cak thei cuanglo tiih mualphonak suak bet lo dingin an tawlrel a si tiah boruak thlirtu pawl in an sim.

Leave a Reply

Your email address will not be published. Required fields are marked *