Falam mipi kan ṭan rual nak rahsuah kan hmu thok thlang

Falam ah caan tawite sungah Covid – 19 pulhnat a karh cak zet nan mina tuamhlawmtu doctor saya/sayamah pawl siseh, khuatlang mipi hruaitu, pawlkom dangdang le volunteers cangvaihnak siseh, kharhkhumaw dingih thusuahmi a thluntu mipi lam zawnlungnak ruangah le ramsung ramleng ṭanpinak phunphun thawn pulhnatpi kan do tlang ruangah nat nei thar an kiang vivo, cumicu zapi kan ṭan rual nak rahsuah tiah kan ti thei.

Falam khuapi ah May thlacem lam in Covid 19 suarthumnak a thok ih June thla thok in mina an pung zutzo. June 2 ah Covid mithi kan nei thok ih thla 2 felfai a kim hlan ah mithi 40 an kim.

Ṭanrual cun ti theih lo a um lo an ti ṭheu bangin ramsung ramleng in ṭanrual a si tikah mina thar an mal vivo ih, June thla thok ihsin nitinten mina thar mipum 5,8,10 ti`n a pehpeh rorin mina an um mi cu tunai hrawng khan mina thar um lo ni khal a um phahphah thlang a si.

Ṭhat lam kan pan rualrual in thlah dah ih um a theih lo ih hmailam caan ah kan khua kan ram him thei sinsin dingin tumtah khuakhannak a um mi cu Chin Relief-rehabilitation and Community Development Foundation (CRCDF) ṭuanvonei mipakhat in internet cahmai ah a hnuailam bangtukin a tarlang a si.

Tuhrawng Kan COVID Boruak Cungcaang

Falam khuapi ah leitlun pulhnat COVID-19 ih in nuainak thla hnih a kim thlang. May 20 ihsin COVID tisuar vei thumnak kan tuar thok ih June 1 ihsin minaa kan karh vivo hnu June 2 ah COVID mithi kan nei thok ih thla 2 sungah in cemsantu 40 an kim zo.

Zapi ih țangkhawmnak in hih pulhnat dokham cio a siih Falam ahcun siizungpi hrambun in minaa pawl zohkhen thei a si ruangah hihnak besia thei dinhmun ihsin kan zia deuhnak a si. Oxygen plant kan rak nei ciami khal tampi in bawmtu a si.

Atu ah kan oxygen plant cu vei hnihnak a siat lala ih minaa pawl ba-hlah lo dingin Magwe ramțhen, Pauk peng ah kan oxygen bur pawl refill kan tuah ter lai. Kan cet a her nawn lo ruangah Mandalay le Monywa lam ih kan milesa pawl hnen kan hlaanmi oxygen bur 40 lenglo khal kan cah rero saal. Tuțum a siatmi rem phah in kan oxygen cet cu setting thleng cih thei kan tum. Kan cet hi minute 1 ah 300 liter suah theimi ting 3500 man cet phun a si. Cet thar bun bet ding kan ruat na’n minaa ihkhun kiang ihsin pipe line thawn oxygen hawp thei dingih kan tuah a si le a fuh deuh ding ruangah oxygen bur pawl ih thunmi si loin minaa pawl in direct an hawp theimi phun ah setting thleng tummi a si.

Minaa thar dinhmun kan zoh tikah tawkfang cu nat kan control thei thlang a bang ruangah Falam khuasung ih veng pawl ah Volunteer pawl in nat zohfelnak kan tuah thlang ding. Himi hi kan kharhkhum awnak ruangih rahsuahmi tiah sim sehla a sual lemlo ding. Curuangah a țul ahcun kharhkhum awnak pehzom hrih a si dingih zocio in, thih le nun thu a si ruangah, thinsau lungfual te’n kan thlun țențo cio hrih pei. Falam khuapi lawng si loin Laikhua lam ih bial siizung le siikhaan pawl thawn khal cat loin pehtlaihnak kan nei ih khuate lam khal ngeihven ringring an si.

Vengtin ih nat zohfelnak result zoh in Falam khuasung hrang nat kan control thei tik ahcun lutsuaknak gate pawl tifel saal a si dingih Quarantine center pawl tuah in hmundang ihsin a ratu pawl cu ahran te’n ret in nat dokhamnak pawl a dotdot te’n tuah vivo hrih ding kan si.

Atu hi Relief timi runhim awnak ah kan taalbuai lai ih himi țheh in Rehabilitation timi tundin saalnak khal țuan peh hrih ding kan si. Pakhat le pakhat sirhsan aw in, zawnruat seherhnak thawn atu vek te’n kan țuankhawm tlaang dingih a reihlan ah hih pulhnatpi ihsin Pathian in luat theinak in co ter ding tiah kan zumhnget a si.

Leave a Reply

Your email address will not be published. Required fields are marked *