Falam ih Covid mithi an tam tuk nak san cu Siibawipa in hitin a rel

Falam khuasung ah 2021, May 20 in Covid mina an hmu thok sal ih, July 5 tiang mipum 977 nat check mi ah positive mipum 359 an hmu zo.

Khuasung mipum mal le caan tawite sungih nat a karh cak dan zoh cun dinhmun sezet ih ruah a si hlei ah June thlasung lawngah Covid ruangih thi mipum 17 an um zo.

Caan tawite sungah cutluk rori`h mithi an tam cu Siizungpi ih Dr. Tluang Cung Thang in hitin a rel.

“Falam Siizung ih Covid 19 mina kan tuamhlawm dan kan zoh tikah thawsam zual (oxygen level tlaniam) hlan in Siizung ra thleng zate deuh thaw cu damcak in an suak sal tiah kan hmu”.

“Thawsam zual hnu ih Siizung ra thleng pawl lakah mithi khal an tam. An dam sal a si khal le hlan hnakin ka cuap a cak lo an ti tlangpi” a ti.

Curuangah inn tin ah Oxygen level theitheihnak pulse oximeter kan nei thei le a ṭha. Oxygen level 92 hnakin a tlaniam cun Siizung lam pan a ṭha bik tiah Dr. Tluang Cung Thang cun a rel bet hrih a si.

Siarbet : COVID 19 third wave Falam

OXYGEN HAWP RERO HMANSEHLA….. by: Dr. Steven Cung Sin Thawng Luai

Thli kan hawp mi sung ih tel mi Oxygen hi kan cuap sung a thlen in cuap ih um ဘောလုံး vek thlibawm (Alveoli) pawl ih နံရံပါး a pahtlang ih cu mi thlibawm ih thihri fatete (Capillaries) ihsin thisen sung ah a lut. Cuti cun thisen sung ihsin kan taksa hmun tin ah a thleng.

COVID nat ngah pawl hi nat ngah hnu ni 5 le ni 12 karlak hrawng ah nat a puang ttheu ih nat ngah tu ih 20% hrawng hi an besia ttheu. Hi mi COVID nat hrik hin cuap hi a dodal cuang ih thlibawm pawl cu an thling, tii a suak ih nehhnu ah cun Oxygen a zuuk thei nawn lo. Cu tik ah minaa cu khuh le taksa men si lo in thawsam le thawkhop lo in an um.

Cui tlun ah hih nathrik hin nat do tu thisen (lymphocytes) khal a kaang ter ih a that cih fawn. Cutik ah nathrik dang dang(Bacteria) pawl khal an ra lut cih sin sin. Cu lawng sihrih lo in COVID nat an besiat vivo cun thii a khal ih thihri fatete ihsin a tumdeuh tiang a phit hrih. Cutik ah cun a leng ihsin Oxygen nasa tak ih pek rero khal le cuap sung ah a lut thei lo ih thisen sung ah a thleng thei nawn lo. Hi mi thikhal (bloodclots) pawl hin thluak le lung lam thihri pawl a phih bet a si ahcun zamrang zet ih thih a ol te.

Curuangah kum upa nauta le natnei cia le cia lo ti um lo in an thi ttheu. COVID nathrik ih cuap a siatsuah (Fibrosis) mi tam le mal ih zir in Oxygen sam daan khal an bangaw lo. Minaa hrekkhat cu an besiat nak in an damcak sal deuh hman ah an cuap a siat mi a tam deuh a si le rei deuh(thla khat zik) tiang Oxygen pek an ttul ttheu.
Curuangah COVID nat in cuap a siatsuah tam man hlan ah dam lo le mah ten zumhmang in sii ei lo in thawthawt a nuam lo deuh veten piah aw lohli hi a thupi zet.

Kutzim Oxygen tah nak (Pulse Oximeter) nei pawl khal thisen sung Oxygen tam le mal a tu le tu tah ring ring a ttha.
Ps. SpO2 < 92% a si ah cun zamrang ten sizung lam pan a ṭul.

Leave a Reply

Your email address will not be published. Required fields are marked *