Falam ah SAC ralhraang Helicopter a ṭum + Atufang Falam dinhmun

Falam khuasung ih meithal puak thawm a thang hnu nithumnak sunpadir ih SAC ralhraang Helicopter a ṭum cu ruahnak phunphun a suak ter.

Khuasungum pawl cun minute 5 hrawng hnu ah a zaam cihsal tiah an sim ih bank hrang paisa a rak phurta siding titu an um bangin Lungbang kiang doawk ṭum ih hriamtuar a ra phur hai ta si ding titu khal an um.

Ziang a phur khal a va si le tu dinhmun ah Falam boruak cu a hlan hnakin a danglam zetih Dothleng cangvaihnak hrang hmalaknak nei rerotu Falam CDM Supporters khalin Zaan ah suakvak tuk lo dingin le Hramlak ah ramtawi sa dawi feh lo dingin mizaan lam ah thuthannak a nei zo a si.

May 23 ih thuthanmi cu
1. Kan boruak dinhmun cu ziangtin a si tin simawk ṭul nawn lo khop in mipi kan zate ih theihmi a si.

2. Cuti a si ruangah mipi pawl kan him thei biknak hrang tiah Falam CDM Committee cun Falam khuasung ah zaan hnu suakvak tuk lo dingin le ṭul poimawh tuk thu a um lo ahcun inn sung te ah um cio dingin lo sawm kan duh a si.

3. Hmun tinkip ah rin lopin Ral lo Kap pawl an um phah ṭheu ruangah a hleice in hramlak sa dawi khal cawl hrih dingah kan lo sawm a si.

4. A tlun ih thuhla pahnih cu mipi himnak hrang tiah sawmnak kan nei bikmi a siih mipi lam khal in thlun zuam cio dingah sawm kan duh cih bet a si.

zuk : April 10, Falam ih Helicopter a ṭum lai

Siarcih : Falam khuasung ah SAC ralhraang in meithal hmet puak

Falam peng, Lungbang kiang ih doawknak a suak hnu a nikhat nakah Falam ih um SAC ralhraang cun an puarthaunak tilangin khuasung ah voihnih rori meithal an hmetpuak.

Khuasung ih meithal kahpuah thu cu Falam CDM Supporters in a tarlang ih hriamhma tuar le khawngaw cu an um lo tiah theih a si.

“Tuni zing 11:30 kiangkap hrawngah မီးသတ် zunglam Tlanghel zin ih Inn sak hnaṭuan unau hnih te bike thawn an feh lai ah Uico pawl in an kap”.

“Sinan, Pathian ih lam hruai umpi nak in hriamtuar ko in an kap ngah lo. An kap thinphang ah nautasawn cu bike par in a dawp ih hramlak ah ke in tlan. A upa cu bike thawn a tlan. A uupa cu inn lam a thleng zo nan nautasawn hi hramlak lam i tlan a si ruangah tutiang inn lam a thleng hrih lo” tiah FCDMS in a taar.

Cumicu SAC ralhraang in voikhatnak meithal an hmetpuak mi a si ih caan tawkfang hnu ah nautasawn khal himdamten inn lam a thleng thei sal tiah theih a si.

Voihnihnak cu Congheng ziin lam ah a si ih lamziin fehmen bike to mino pakhat cu lau dingin ralhraang pawl in meithal an puahkhum.

“Zinglam nazi 11 luan hrawng thotho ah a si ih Congheng ih mino pakhat cun bike to in a hmai ih ralkap mawṭaw cu a hei luan. Cawl dingin an auh ih a cawl duhlo ruangah meithal an puah khum” tiah tualsungum mipakhat in a ti.

Khuasung rori ah thu mumal umloin SAC ralhraang in meithal voihnih rori an hmetpuak cu khuasung um pawl in himlo zetin an theiaw a si.

Cuvek dinhmun a si ruangah မီးသတ် zung umnak lam tlanghel ziin hrial dingin le ṭullo nakah vak sukso lo dingin FCDMS in tlangthannak an nei ih “Conheng le Zamual lak khalah SAC ralhraang pawl an um ṭhepṭhep. Curuangah kan feh sukso tikah ralring fimkhur cio uh si” tiah an tarlang a si.

Leave a Reply

Your email address will not be published. Required fields are marked *