Falam Zipeng zung ih hnaṭuan mi 4 cu Permanent in hnaṭuan an ban

Falam Zipeng zung (GAD) ih hnaṭuan mi 4 cu mipi lam ah ṭangin ralkap ukhruai dodalnak CDM i an tel ruangah permanent in hnaṭuan an ban tiah theih a si.

Hnaṭuan ban tuar pawl cu Mai Rebecca, Mai Ca Len Par, Mai Siang Hlei Tlem le Salai Johan te pawl an si ih hnaṭuan ban theihternak ca cu March 25 nikhen a si.

Mai Rebecca, Mai Ca Len Par, Mai Siang Hlei Tlem te pathum cun March 3 ah caam khat sung hnaṭuan ban an si thu theihternak ca an dong zo ih, tu ah mipakhat belhbet in permanent in hnaṭuan ban an si thu theihternak ca an suah sal hi a si.

March 25 nikhen mi hnaṭuan bannak ca ah cun “tlunlam ih thupek vekin rampi cozah hnaṭuan phungdaan pahbaltu Mai Rebecca, Mai Ca Len Par, Mai Siang Hlei Tlem le Salai Johan te pawl cu March 25 ihsin hnaṭuan ban hremnak kan pe a si”.

“Hremnak pemi thu ah fiangfailo/lungkimlo nak a um asile rampi cozah hnaṭuan phungdaan vekin thla 6 sungah “appeal” theh lut theih a si” tiah an ngan.

Hna cawlhter thu ah Mai Siang Hlei Tlem cun “2008 Daanhrampi ahcun party ramkhelnak thawn pehpar lo ding ti a si. Asinan, atui` cangvaihnak (CDM) cu ramkhel party thawn pehparawknak a um lo. Rampi zawng ih buainak sawn a si. Party ramkhel timi cu 2020 rampi hrilawknak an tuah hlan ih mipi hip tumih cangvaihnak nei rero pawl vek kha an si. A cem net tiang lawlaw ka ṭang ding” tiah a rak relsuak dah a si.

Leave a Reply

Your email address will not be published. Required fields are marked *