Falam Volunteers pawl an caurau, Thazaangthar an ṭul

Falam khuapi kilhimtu khuasung cozah ṭuanvonei (Falam Covid-19 Committee), tualsung mino le  Volunteer pawl in Covid 19 dokham in nasaten hmalaknak an nei cingin Falam khuasung ah Covid nathrih a lut zo.

Atufang, Falam ah Covid 19 positive mina 9 an um ih FQ ih zohkhen mi rinhleh mina 50 luan an um. Khuasung rori ih natnak nei an um zo tikah Volunteers pawl cu a hlan aiin nasaten ṭan an lak sinsin.

“Khuasung ah Covid 19 natnei 5 an um zo ih nat karhzailo dingin ṭuanvonei pawl in nasa zetin cangvainak an nei. Khuasung ih natnak nei an um zo tikah FQ ih rinhleh mina khal an pung vivo.”

“Cuvek dinhmun a si ruangah khuasung ṭuanvoneitu pawl le mino Volunteer pawl cu nasaten ṭan an la sinsin ih tu ah thazaang derthawm zik dinhmun tiang an caurau zo” tiah tualsungum upa pakhat in FOM hnen ah asim.

Cuvek dinhmun a si ruangah Covid – 19 Falam Volunteer hotu Timmy Htut khalin Volunteers mino thazaangthar an mamawh thu a tarlang ih “Falam FQ ah ni malte sung ah mipum 64 an kim cih! Volunteers thazaang a der zik thlang, Mino a manman volunteer hnaṭuan in bawm ding ah volunteer aiawh in ka lo sawm!” a ti.

Falam khuasung um lakih nat nei hmuh netabik cu January 18 ah a siih amah telin atufang Falam Siizungpi ah Covid 19 mina 9 an um a si.

Leave a Reply

Your email address will not be published. Required fields are marked *